აშშ მკაცრად გმობს რუსულ სარაკეტო თავდასხმას ოდესის პორტზე.
აშშ-ის სახელმწიფო მდივანი, ენტონი ბლინკენი აცხადებს, რომ ეს ქმედება ბადებს ეჭვებს რუსეთის მიერ შეთანხმების შესულების სანდოობაზე.
"აშშ მკაცრად გმობს რუსულ სარაკეტო თავდასხმას ოდესს პორტზე. შეთანხმების დადებიდან 24 საათში რუსეთმა დაარღვია თავისი ვალდებულებები ისტორიულ პორტზე თავდასხმით, საიდანაც, ამ შეთანხმების ფარგლებში, კვლავ უნდა მომხდარიყო მარცვლეულისა და სოფლის მეურნეობის საექსპორტო პროდუქტის ტრანსპორტირება.
უკრაინაზე თავდასხმის გაგრძელებით კრემლი აგრძელებს მილიონობით მშვიდობიანი მოქალაქის უსაფრთხოების უგულებელყოფას.
ოდესის პორტზე თავდასხმა იწვევს სერიოზულ ეჭვს რუსეთის მიერ 22 ივლისის შეთანხმებისადმი ერთგულების სანდოობის შესახებ და ძირს უთხრის გაეროს, თურქეთისა და უკრაინის მუშაობას მსოფლიო ბაზრებზე კრიტიკულად მნიშვნელოვანი საკვების გატანაზე. რუსეთს ეკისრება პასუხისმგებლობა გლობალური სასურსათო კრიზისის გაღრმავებაზე. მან უნდა შეაჩეროს თავისი აგრესია და სრულად შეასრულოს შეთანხმება, რომლის განხორციელების პირობაც დადო". - ნათქვამია ენტონი ბლინკენის განცხადებაში.
უკრაინიდან ხორბლის გატანის შესახებ კიევის და მოსკოვის შეთანხმებიდან ერთი დღის შემდეგ რუსეთმა ოდესის პორტი დაბომბა.
22 ივლისის შეთანხმებით, რუსეთმა პირობა დადო, რომ მიზანში არ ამოიღებდა პორტს, სანამ აქ მარცვლეულით დატვირთული გემები იმოძრავებდნენ.
შეთანხმება გაერომ დაახასიათა, როგორც იმედის სხივი რამდენიმეთვიანი ომის პირობებში.
უკრაინის არმიის სამხრეთ სარდლობამ განაცხადა, რომ 23 ივლისს, გამთენიისას ოდესის პორტში 2 ბომბი ჩამოვარდა, კიდევ 2 კი საჰაერო თავდაცვამ გაანეიტრალა.
პრეზიდენტ ვოლოდიმირ ზელენსკის ოფისის ხელმძღვანელმა, ანდრეი ერმაკმა თავდასხმა დაგმო და რუსეთი „საკვების კრიზისის სისტემატურ შექმნაში“ დაადანაშაულა.
დახურვა