დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, მიუხედავად კორონავირუსით გარდაცვლილი პაციენტების მატებისა, საერთო ინფიცირებულებთან პროცენტული მაჩვენებელი დაახლოებით 0.57%-ია, რაც ევროპაში ერთ-ერთი ყველაზე დაბალი მაჩვენებელია.
როგორც გამყრელიძე ამბობს, გარდაცვლილი პაციენტების უმრავლესობა მძიმე მდგომარეობაში იყო.
მისივე თქმით, ბოლო ერთ კვირაში კორონავირუსით ინფიცირებულთა გარდაცვალების 3 შემთხვევა აჭარას უკავშირდება.
"ერთი კვირის განმავლობაში, სამწუხაროდ, გვაქვს გარდაცვალების 7 შემთხვევა. ძირითადად ეს შემთხვევები იყო მძიმე, აქედან 2 იყო ჩვენი არაკონტროლირებადი ტერიტორიიდან გადმოყვანილი მძიმე ავადმყოფები. დანარჩენი ასევე მძიმე კრიტიკული ავადმყოფები, რომლებიც იმყოფებოდნენ რეანიმაციულ განყოფილებებში ხელოვნურ ვენტილაციაზე და აქედან, თუ არ ვცდები, 3 შემთხვევა უკავშირდება აჭარას.
რა თქმა უნდა, თითოეული სიკვდილი ტრაგედიაა, მაგრამ გარდაცვლილთა პროცენტულთა მაჩვენებელი საერთო ინფიცირებულებთან გვაქვს დაახლოებით 0.57%, რაც ერთ-ერთი ყველაზე დაბალია ევროპაში",-აცხადებს გამყრელიძე.
დღეს, 26 სექტემბერს საქართველოში კორონავირუსის ახალი, 296 შემთხვევა გამოვლინდა, გამოჯანმრთელებულთა რაოდენობა 60-ით გაიზარდა, გარდაიცვალა - 1.
დაავადებათა კონტროლის ცენტრის ცნობით, ბოლო 24 საათში 9 663 ტესტი ჩატარდა.
26 თებერვლიდან დღემდე ქვეყანაში ვირუსის 4 960 შემთხვევაა გამოვლენილი, მათ შორის 1 819 გამოჯანმრთელდა, 28 პაციენტი კი გარდაიცვალა.
დახურვა