ისრაელის ცენტრალური საარჩევნო კომისიის მიერ საარჩევნო უბნების 57.3%-ის დათვლის შემდეგ, პრემიერ-მინისტრ ბენიამინ ნეთანიაჰუს მხარდამჭერ ბლოკს 120-ადგილიან ქნესეთში 55 მანდატი აქვს, მის მოწინააღმდეგე ბლოკს - 49, არაბულ პარტიებს კი - 12. მონაცემები ადგილობრივი დროით დილის 07:58 საათის მდგომარეობითაა გამოქვეყნებული.
წინასწარი შედეგებით, ნეთანიაჰუს პარტია „ლიკუდი“ 27 მანდატს იღებს, მისი მთავარი კონკურენტის, გადი აიზენკოტის პარტია „იაშარი“ კი - 21-ს.
ისრაელის მთავრობის დამოუკიდებლად ფორმირებისთვის აუცილებელია ქნესეთში მინიმუმ 61 მანდატის მოპოვება. შესაბამისად, ამ დროისთვის ვერც ერთი პოლიტიკური ბლოკი საჭირო უმრავლესობას ვერ აგროვებს.
ნეთანიაჰუ აცხადებს, რომ მემარჯვენე ბლოკმა სიონისტ ამომრჩეველში „გადამწყვეტი უმრავლესობა“ მოიპოვა და მემარჯვენე მთავრობის ფორმირებას გეგმავს. ამასთან, ოპოზიციის ლიდერმა გადი აიზენკოტმა მას მოუწოდა, არჩევნებში მარცხი აღიაროს და თანამდებობა დატოვოს.
წინასწარი მონაცემებით, არჩევნებში ამომრჩეველთა აქტივობამ 77.7% შეადგინა, რაც 1999 წლის შემდეგ ყველაზე მაღალი მაჩვენებელია. საბოლოო შედეგები ჯერ ცნობილი არ არის.
დახურვა