კობახიძემ ზურაბიშვილს "სამარცხვინო ქალბატონი" უწოდა

საკონსტიტუციო სასამართლოში მიმდინარე განხილვაზე ქართული ოცნების თავმჯდომარე ირაკლი კობახიძემ პრეზიდენტ სალომე ზურაბიშვილს "სამარცხვინო ქალბატონი" უწოდა. ამაზე სხდომაზე გუშინ, 4 ოქტომბერს კობახიძემ შეურაცხყოფა თამარ ჩუგოშვილსაც მიაყენა.

"თქვენ ხომ ეს იკითხეთ, სალომე ზურაბიშვილის მიმართ რა პოლიტიკური დამოკიდებულება გვაქვს, ჩვენ მიგვაჩნია, რომ ის არის სამარცხვინო...
სალომე ზურაბიშვილი პირდაპირ უპირისპირდება არამხოლოდ 52-ე მუხლს და საერთოდ ყველა მუხლს… სამარცხვინო ქალბატონია, სამარცხვინო ქალბატონია მეთქი თქვენი პრეზიდენტი", - მიმართა კობახიძემ პრეზიდენტის წარმომადგენლებს.

უკვე მესამე დღეა, საკონსტიტუციო სასამართლოში პრეზიდენტის იმპიჩმენტის წარდგინების განხილვა გრძელდება. 

საქმეს პლენუმი განიხილავს. პრეზიდენტი პროცესს არ ესწრება. მისი წარმომადგენლები კი თამარ ჩუგოშვილი და მაია კოპალეიშვილი არიან. 

გადაწყვეტილების მისაღებად პლენუმს 2 კვირა აქვს. თუ საკონსტიტუციო სასამართლო სალომე ზურაბიშვილის მხრიდან კონსტიტუციის დარღვევას დაადგენს, პოლიტიკური პროცესი პარლამენტში გადაინაცვლებს. 

პრეზიდენტის იმპიჩმენტისთვის საჭიროა პარლამენტის 2/3, ანუ 100 დეპუტატის ხმა. ამ ეტაპისთვის ქართულ ოცნებას საჭირო მხარდაჭერა არ აქვს. 

პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".

30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.