მსოფლიოში კორონავირუსით ინფიცირებულთა რაოდენობამ ნახევარ მილიონს გადააჭარბა

მსოფლიოში კორონავირუსით ინფიცირებულთა რაოდენობამ ნახევარ მილიონს გადააჭარბა. გლობალურად ვირუსს უკვე 24 ათასზე მეტიადამიანი ემსხვერპლა.

ამერიკის შეერთებულმა შტატებმა ინფიცირებულთა რაოდენობის მიხედვით ჩინეთს გადაასწრო. შეერთებულ შტატებში კოვიდ 19-ი 85 000-ზე მეტ ადამიანს დაუდასტურდა. დაიღუპა 1 300 ადამიანი.  

კვლავ მძიმეა ვითარება იტალიაში, სადაც 80 ათასზე მეტი ადამიანია ინფიცირებული. გასული დღის განმავლობაში ვირუსს 712 ადამიანი ემსხვერპლა. დაღუპულთა საერთო რაოდენობა უკვე 8 ათასს აჭარბებს.

4 365-მდე გაიზარდა დაღუპულთა რაოდენობა ესპანეთში. ადგილობრივი მედიკოსების განცხადებით, ისინი ეპიდემიის გამწვავებას უახლოეს დღეებში ელოდებიან. ქვეყნის მასშტაბით კოვიდ 19-ის 56 ათასი დადასტურებული შემთხვევაა.

გარდაცვლილთა რაოდენობა გაიზარდა საფრანგეთში, სადაც ვირუსის შედეგად გამოწვეული გართულებებით დღის განმავლობაში 365 ადამიანი დაიღუპა. კოვიდ-19 დაუდგინდა რუსეთის პრეზიდენტის ადმინისტრაციის რამდენიმე თანამშრომელს. ბოლო მონაცემებით, რუსეთში 182 ახალი შემთხვევა დაფიქსირდა. დაღუპულია 3 ადამიანი.