პარლამენტის პლენარულ სხდომაზე დაპირისპირება იყო. შელაპარაკება ოპოზიციონერი დეპუტატების მიერ ტერმინი რუსული კანონის ხსენებას მოჰყვა.
სხდომაზე პარლამენტის თავმჯდომარე, შალვა პაპუაშვილმა დეპუტატები გააფრთხილა, ამ ტერმინის ხსენების შემთხვევაში, მათ მიკროფონებს გაუთიშავს.
"კიდევ ერთხელ, ეს არის ანტიქართული პროპაგანდა, რომელსაც თქვენ ახლა ქართულ პარლამენტში ეწევით. ანტიქართული პროპაგანდისა და ამის ძახილის უფლებას აქ არ მოგცემთ. ყველას გავუთიშავ მიკროფონს, ვინც "რუსულ კანონს" გამოიყენებს. ნუ ატყუებთ ქართველს ხალხს - გაგივიდათ შარშან, წელს არ გამოგივათ. დიახ, ეს ტყუილია - ქართულ კანონს რუსულს რომ ეძახით", - თქვა პაპუაშვილმა.
ხმაურის გამო, დარბაზი დაატოვებინეს ალეკო ელისაშვილს.
"არ უნდა გავატანინოთ ეს კანონი. ყველას მოვუწოდებ ვინც არის ნორმალურ ადამიანი ამ ქვეყანაში და უნდა, რომ ეს ქვეყანა გახდეს ევროპის ნაწილი - აბჯარი აისხით, მოემზადეთ, დიდი ვნებათაღელვა და ცემა-ტყეპა გველის. ეს არ უნდა გავატანინოთ", - თქვა მან ჟურნალისტებთან საუბრისას.
***
ქართული ოცნება რუსულ კანონპროექტს პარლამენტში ხელახლა დააინიცირებს. ეს უმრავლესობის ლიდერმა მამუკა მდინარაძემ ბრიფინგზე თქვა.
მან პარტიის ვრცელი განცხადება წაიკითხა, სადაც უმრავლესობა კვლავ თავს ესხმის არასამთავრობო სექტორს და მათგან დაფინანსების გამჭვირვალობას მოითხოვს.
მდინარაძის თქმით, კანონპროექტი დღეს დაინიცირდება და "სამივე მოსმენით სესიის ბოლომდე იქნება მიღებული".
***
რუსული კანონპროექტი ქართულმა ოცნებამ თავდაპირველად 2023 წლის თებერვალში დაააინიცირა, რასაც მასშტაბური საზოგადოებრივი პროტესტი მოჰყვა.
პროტესტის შედეგად ქართულმა ოცნებამ "უცხოური გავლენის გამჭვირვალობის შესახებ" რუსული კანონპროექტის გაწვევის შესახებ 9 მარტს განაცხადა, 10 მარტს კი პლენარულ სხდომაზე ჩააგდო.
კანონპროექტის საწინააღმდეგო პროტესტი 7-8 მარტს პარლამენტის მიმდებარე ტერიტორიაზე მიმდინარეობდა. აქციები იყო ქუთაისში, ბათუმში და სხვა ქალაქებშიც.
თბილისში პოლიციელებმა მშვიდობიანი აქცია წყლის ჭავლით, წიწაკის სპრეითა და ცრემლმდენი გაზით დაარბიეს.
რამდენიმესაათიანი მცდელობების მიუხედავად ხალხი არ იშლებოდა, რის შემდეგაც პოლიციამ აქციის მონაწილეების დაკავება ძალისმიერი მეთოდებით დაიწყო.
პოლიციელები მუშაობაში ხელს უშლიდნენ მედიის წარმომადგენლებს და ჟურნალისტებზე ძალადობის ფაქტებიც დაფიქსირდა. 9 მარტს შსს-მ ადმინისტრაციული წესით დაკავებული ყველა პირი, 133 ადამიანი გაათავისუფლა.
რუსული კანონი "ჯაშუშების" გამოსავლენად - რას უქადის პროექტი ქვეყნის ევროპულ პერსპექტივას.
კანონპროექტის გაწვევის შემდეგ მმართველ პარტიაში ირწმუნებოდნენ, რომ რუსულ კანონს აღარ დააინიცირებდნენ.
დახურვა