რუსეთის პრეზიდენტი ვლადიმერ პუტინი ამბობს, რომ უკრაინაში მიმდინარე "სპეციალური სამხედრო ოპერაციის" მიზნები არ შეცვლილა და რუსეთი კვლავ დონბასის რეგიონის "გათავისუფლებისთვის" იბრძვის.
"არაფერი შეცვლილა, 24-ში [თებერვალს] დილით ადრე პირდაპირ და საჯაროდ ვუთხარი მთელ ქვეყანას, მთელ მსოფლიოს. არაფერი მაქვს დასამატებელი, არაფერი შეცვლილა.
საბოლოო მიზანი - დონბასის გათავისუფლება, ამ ხალხის დაცვა და ისეთი პირობების შექმნაა, რომელიც თავად რუსეთის უსაფრთხოებას უზრუნველყოფს", - ამბობს პუტინი.
ამასთან, პუტინის თქმით, "სპეციალური სამხედრო ოპერაციის" დასრულების ვადებზე საუბარი არასწორია.
"ვადებზე საუბარი არაა საჭირო, მე არასდროს ვლაპარაკობ ამაზე, რადგან ეს ცხოვრებაა, რეალური რამ. გარკვეულ ვადებში მოქცევა არასწორია", - ამბობს პუტინი.
რუსეთმა უკრაინის ტერიტორიების - დონეცკისა და ლუჰანსკის ოლქები "დამოუკიდებელ რესპუბლიკებად" 22 თებერვალს აღიარა, ორი დღის შემდეგ კი, 24 თებერვალს მოქალაქეების "დაცვის" მოტივით უკრაინაში შეიჭრა. უკრაინაში ომს ოფიციალური მოსკოვი "სპეციალურ სამხედრო ოპერაციას" უწოდებს.
დახურვა