მოძრაობა სირცხვილია პრემიერმინისტრ ირაკლი ღარიბაშვილის მხრიდან მედიის წარმომადგენლებისა და სამოქალაქო აქტივისტების მიმართ მუქარას ეხმაურება.
როგორც სირცხვილიას განცხადებაშია აღნიშნული, ღარიბაშვილი, საპატრიარქოსთან კოორდინირებით, 5 ივლისს მომხდარი ძალადობის პირველი და ყველაზე დიდი გავლენის მქონე წამხალისებელია.
"ვეხმაურებით მკვლელი ირაკლი ღარიბაშვილის სამარცხვინო ბრიფინგს. სამწუხაროა, რომ ქვეყნის პირველი პირი, ქვეყანაში დატრიალებული მრავალდღიანი ტრაგედიის შემდეგ, ისევ იცლის, რომ ამ ქვეყნის დემოკრატიული განვითარების მთავარ ხელშემწყობებს - მედიასა და სამოქალაქო აქტივისტებს დაემუქროს.
ჩვენ გვყავს ე.წ. “ქურდული” მენტალიტეტის მქონე, მკვლელი, ჰომოფობი და უღირსი პრემიერმინისტრი. ბიძინა ივანიშვილის პირდაპირი მითითებების ძალადობრივად შემსრულებელი, რომელიც ძალაუფლების ტკბობაში ისეთ ფსკერზე დაეშვა, რომ მისი ყველა სიტყვა უკიდურესად სამარცხვინო და დანაშაულის შემცველია.
ირაკლი ღარიბაშვილი, საპატრიარქოსთან კოორდინირებით, არის 5 ივლისს ძალადობის პირველი და ყველაზე დიდი გავლენის მქონე წამხალისებელი. ის არის პასუხისმგებელი ყველა დაღვრილ სისხლზე, ლექსო ლაშქარავას მკვლელობაზე.
ირაკლი ღარიბაშვილი მისნაირივე ბინძური მეთოდებით ებრძვის ამ ქვეყნის დემოკრატიულ და დასავლურ კურსს, ის არც კი ცდილობს, დამალოს თავისი ძალადობრივი მიდრეკილებები და სჯერა, რომ მის ერთ სიტყვას ამ ქვეყანაში ყველა დაემორჩილება.
ირაკლი ღარიბაშვილო, მკვლელო, ჰომოფობო, შენი ადგილი რუსეთშია. ამ ქვეყანაში შენ არც აწმყო გექნება და არც მომავალი.
თქვენი ხელისუფლებაში ყოფნის მე-10 წელია და ისევ არ გრცხვენიათ, სხვა ძალებს დააბრალოთ ის, რასაც თავად აშავებთ. თქვენი პასუხისმგებლობაა ამ ქვეყანაში თითოეული მოქალაქის ჯანმრთელობისა და სიცოცხლის დაცვა.
თავად განაცხადე 5 ივლისს, დაძაბულობა იქნებაო და როდიდან აღკვეთთ დაძაბულობას 1 საპატრულო ეკიპაჟითა და შეუიარაღებელი პოლიციელებით? თქვენს პოლიციელებს თვალებში წიწაკის სპრეის ასხამდნენ მოძალადეები და თქვენი საპატრულო პოლიციის უფროსს, ვაჟა სირაძეს, ფეხებში უფეთქებდნენ ასაფეთქებლებს, არმატურის ნაგლეჯებსა და ლოდებს ისროდნენ და თქვენ ისევ გიბრუნდებათ ენა, რომ ყველაფერი მედიასა და სამოქალაქო აქტივისტებს გადააბრალოთ.
ირაკლი ღარიბაშვილო, მორჩი სხვების კუნთებზე ყურებას, რადგან შენ მხოლოდ არასრულწლოვან ბავშვებთან გაქვს დიდი გული, ისიც მაშინ, როდესაც შენი მფლობელის შვილი მოგიწოდებს.
სათამაშო ხარ, მარიონეტი, სამარცხვინო და სულელიც. შენ გადადგები საკუთარი ნებით, ან ამ ქვეყნის თავისუფლებისა და ადამიანების მოყვარე ხალხი გადაგაგდებთ", - ნათქვამია განცხადებაში.
TV პირველის ოპერატორი ლექსო ლაშქარავა, რომელსაც ძალადობრივმა ჯგუფებმა 5 ივლისს სასტიკად სცემეს, გუშინ, საკუთარ სახლში დედამ გარდაცვლილი იპოვა.
ლაშქარავას გარდაცვალების შემდეგ მედიის წარმომადგენლებმა, მოძრაობა სირცხვილიამ და სხვა აქტივისტებმა 18:00 საათზე, პარლამენტის შენობასთან მთავრობის გადადგომის მოთხოვნით საპროტესტო აქცია გამართეს. აქციების ორგანიზატორებმა განაცხადეს, რომ ლაშქარავას გარდაცვალებაზე პასუხისმგებლობა ხელისუფლებას ეკისრება და, შესაბამისად, პასუხიც ხელისუფლების წარმომადგენლებმა და მოძალადეებმა უნდა აგონ.
მათ ირაკლი ღარიბაშვილს ვადა 12 ივლისის 12:00 საათამდე მისცეს იმისათვის, რომ თანამდებობა დაეტოვებინა, თუმცა პრემიერმა დღეს განაცხადა, რომ გადადგომას არ აპირებს. გარდა ამისა, ის ჟურნალისტებს დაემუქრა, რომ თუ თუ აქციის მონაწილეების ქმედებები კანონის ფარგლებს გასცდება, ამისთვის "ყველა უმკაცრესად იქნება დასჯილი".
დახურვა