"ვახტანგ ყიფიანის საქმეში ცალსახად გამოიკვეთა, თუ რამდენი მნიშვნელოვანი ცვლილებების განხორციელებაა საჭირო საკანონმდებლო ბაზაში", - ამის შესახებ ჯანდაცვის მინისტრმა ეკატერინე ტიკარაძემ თაღლითობის ფაქტზე დაკავებულ ექიმებთან დაკავშირებით განაცხადა.
ამ საკითხზე ტიკარაძემ დღეს სხვადასხვა სამედიცინო დაწესებულების ექიმებთან შეხვედრისას ისაუბრა. როგორც მან აღნიშნა, უწყება მზადაა, საკუთარი კომპეტენციის ფარგლებში იმოქმედოს იმისათვის, რომ საქმეში მეტი სიცხადე შეიტანოს.
"ვახტანგ ყიფიანი უნდა იყოს ბოლო ექიმი, რომელიც მოხვდა იმ გარკვეულ გაუგებრობაში, სადაც მას დღესდღეობით ეწოდა თაღლითი ექიმის სახელი. აქ არის მნიშვნელოვანი, რომ განსაზღვრული იყოს კომპეტენციები, თუ რომელ ექიმს რა ჩარჩო დოკუმენტიდან რა რეგულაციებით აქვს უფლება, მიიღოს გარკვეული ტიპის პაციენტი და შესაბამისად განახორციელოს გარკვეული ტიპის ჩარევა. მნიშვნელოვანია უმოკლეს ვადაში მომზადდეს ეს რეგულაცია, იმისათვის, რომ ყიფიანის მსგავსად სხვა ექიმებიც არ აღმოჩდნენ მსგავს ვითარებაში", - აღნიშნა მინისტრმა.
მისივე თქმით, აუცილებელია, პარლამენტმა სამინისტროს მიერ ინიცირებული შესაბამისი კანონპროექტები უმოკლეს ვადაში მიიღოს, რათა მსგავსი შემთხვევები არ განმეორდეს.
"მნიშვნელოვანია აღინიშნოს არაერთი მსჯელობა სამინისტროს მხრიდან ინიცირებულ კანონზე, რის შედეგადაც სამინისტრო იძულებული გახდა, რომ გამოეწვია კანონი საკანონმდებლო ორგანოდან. ეს უმოკლეს ვადაში უნდა იქნას მიღებული, რათა მსგავსი შემთხვევები დარეგულირებული იყოს რეგულირების სააგენტოს, სამინისტროს, კლინიკასა და პაციენტს შორის მანამ, სანამ ეს მიიღებს მსგავს დრამატულ განვითარებას", - განაცხადა ტიკარაძემ.
რაც შეეხება კითხვას - არის თუ არა ექიმი ვახტანგ ყიფიანი დამნაშავე? - მინისტრმა აღნიშნა, რომ საკანონმდებლო ხარვეზების გამო, გარკვეული გადაცდომები იკვეთება, თუმცა საქმის სირთულიდან გამომდინარე, კონკრეტულ შეფასებებს ვერ გააკეთებს.
"ეს კონკრეტული შემთხვევა არის საკმაოდ კომპლექსური და რთული. აქედან გამომდინარე, მაშინ როდესაც 20 თვეა მიმდინარეობს აქტიური გამოძიება, არ მაქვს უფლება მივიღო კონკრეტული დასკვნა იმასთან დაკავშირებით, იყო ის დამნაშავე თუ არა", - განაცხადა ეკატერინე ტიკარაძემ.
თბილისის პროკურატურის ინფორმაციით, სამსახურებრივი გულგრილობის, სამსახურებრივი მდგომარეობის გამოყენებით თაღლითობისა და უკანონო საექიმო საქმიანობის ფაქტზე, მოსამართლის განჩინების საფუძველზე, თბილისის ცენტრალური საავადმყოფოს დირექტორი გ.ლ. და ამავე კლინიკის ექიმი ვ.ყ. დააკავეს, ხოლო უკანონო საექიმო საქმიანობის ფაქტზე მ.ხ.-ს მიმართ დაუსწრებლად გამოიტანეს დადგენილება ბრალდებულად პასუხისგებაში მიცემის შესახებ.
გამოძიების ცნობით, საავადმყოფოში ერთერთ პაციენტს ოპერაცია შესაბამისი ლიცენზიის არმქონე ექიმებმა ჩაუტარეს, რასაც მისი ჯანმრთელობის მდგომარეობის გართულება მოჰყვა და ის დღემდე კომატოზურ მდგომარეობაშია.
საქართველოს პროკურატურა სამივე ბრალდებულის მიმართ პატიმრობის გამოყენების შუამდგომლობით თბილისის საქალაქო სასამართლოს მიმართავს.
დახურვა