დროას ლიდერი ელენე ხოშტარია ამბობს, რომ სუს-ის ფაილები, რომლებიც ადასტურებს, რომ პოლიტიკოსებს პარტიებში ჩანერგილი აგენტების დახმარებით უთვალთვალებდნენ, ანგრევს სახელმწიფო ინსტიტუციებს და ემსახურება მხოლოდ ბიძინა ივანიშვილის ინტერესების დაცვას.
ხოშტარია ტელეკომპანია პირველის მიერ გუშინ, 18 სექტემბერს გავრცელებულ სუს-იდან მიწოდებულ ინფორმაციას ეხმაურება, რომლის თანახმადაც, ოპოზიციურ პარტიებში აგენტები არიან ჩანერგილები, ისინი კი ძირითადად სტუდენტები არიან. ასევე არხისთვის მიწოდებული მასალების მიხედვით, უთვალთვალებენ ოპოზიციონერი დეპუტატების პირად აქტივობებსაც.
ხოშტარიას თქმით, ოპოზიცია ვალდებულია გადავიდეს არ თანამშრომლობის ეტაპზე, "რადგან ნებისმიერი მიმართვა სუს-ის ხელმძღვანელის მიმართ, გამოიძიოს თავისი უკანონობა, არის ილუზია და ახანგრძლივებს ამ რეჟიმს".
"რაც ჩვენ ვნახეთ შაბათს, ეს აღწევს გამაოგნებელ, ავადმყოფურ, მანიაკურ მასშტაბს, რომელიც ანგრევს ადამიანის, მოქალაქის თავისუფლებას, მშვიდობას, უსაფრთხოებას ჩვენს ქვეყანაში და ასევე ანგრევს სახელმწიფო ინსტიტუტებს და სახელმწიფოს. მასშტაბი, რომელიც ჩვენ ვნახეთ, ახალგაზრდების, სტუდენტების ჩართულობა და კარგად არის გამოსაკვლევი, რის ხარჯზე არიან სტუდენტები ჩართულები, მათ შორის არის თუ არა შანტაჟი და ზეწოლა, გარდა იმისა, რომ მათ სთავაზობენ ფულს. სტუდენტების ჩართულობა ჩანერგვაში რისთვის, განსხვავებული აზრის და ოპონენტების კონტროლისთვის, არა რუსეთის აგენტების კონტროლისთვის, არა სახელმწიფო ინტერესების დაცვისთვის, არა საოკუპაციო ხაზიდან გატაცებული ადამიანების უფლებების დაცვისთვის, არა უსაფრთხოების დაცვისთვის, არამედ ბიძინა ივანიშვილისთვის არასასურველი ადამიანების თვალთვალისთვის.
ჩვენ, საქართველოს მოქალაქეები, ყველა ერთად რომ უნდა ვცხოვრობდეთ, რაც არ უნდა განსხვავებულები ვიყოთ, ამ სისტემამ დაგვაპირისპირა და ერთი მეორეს ჩაუსვა სახლში, ოთახში, საავადმყოფოში, გლოვაში და ა.შ. ვნახეთ მასშტაბი, რომელიც მართლა წარმოუდგენელია გარყვნილების თვალსაზრისით. გასვენებაში გადაღებული ფოტოები და მიყურადება და კონტროლი, ექიმთან კომუნიკაციის, მშობლებთან კომუნიკაციის გადაღება. თითო ადამიანზე, მათ შორის აქტივისტებზე მუშაობენ ჯგუფები. წარმოიდგინეთ, მილიონები, რომლებიც იხარჯება იმისათვის, რომ ვიცხოვროთ უსაფრთხოდ და მთავარი ჩვენი საფრთხე მომდინარეობს რუსეთისგან, ეს მილიონები იხარჯება იმისთვის, რომ ერთმა ქართველმა მეორე ქართველი გაანეიტრალოს, ჩაერიოს, ღირსება შეულახოს და უკარნახოს, როგორ იცხოვროს. ამიტომ ჩვენ, რაც არ უნდა ვიცოდეთ, რომ ეს მოსმენა არ არის ახალი, ამ მასშტაბთან შეგუება ნიშნავს საკუთარ ღირსებაზე, თავისუფლებაზე, მშვიდობაზე, ზოგადად საქართველოში ცხოვრებაზე უარის თქმას და ამას, რა თქმა უნდა, არავინ აპირებს. ყველაზე მთავარია რა დასკვნას ვაკეთებთ:
- მადლობა ჟურნალისტებს და ყველა იმას, ვინც ამხელს ამ სისტემას და ჩვენ, რა თქმა უნდა, ჩვენ პარტნიორებს, მათ შორის იმათ ვინც სანქციებზე მუშაობს, აბსოლუტურად ყველა ადამიანის ფაილს მივაწვდით, ვინც ამაში იყო ჩართული და აღარ ვლაპარაკობ იმაზე, რომ სუს-ის თავი ლილუაშვილი და თავის დროზე გომელაური და მთავარი, ბიძინა ივანიშვილი აუცილებლად უნდა დაისაჯონ მსგავსი ქმედებებისთვის.
- არავითარი შიში და არავითარი შეგუება. ჩვენ ამ ქვეყანაში ბევრად მეტნი ვართ ის ხალხი, ვისაც ასე ცხოვრება არ გვინდა. ჩვენ შეიძლება ერთმანეთი არ მოგვწონდეს, ვაკრიტიკებდეთ მაგრამ ასე ცხოვრება შეუძლებელია ვინმეს უნდოდეს, რომ გასვენებაში და ექიმთან ვიზიტის დროს გვიღებდნენ სურათებს და გვისმენდნენ. ამიტომ, აქ უნდა ვთქვათ, რომ ამ საკითხის წინაშე ვართ ერთიანები და არ შევეგუებით.
- ოპოზიცია, ჩემი აზრით, ვალდებულია, რომ სწორი დასკვნები გამოიტანოს და გადავიდეს არ თანამშრომლობის ეტაპზე, იმიტომ რომ ნებისმიერი მიმართვა სუს-ის ხელმძღვანელის მიმართ, რომ თითქოს ის გამოიძიებს თავის უკანონობას, სისხლის სამართლის დანაშაულს, არის ილუზია და ახანგრძლივებს ამ რეჟიმს.
ჩვენ ვართ მშვიდად, მტკიცედ, ვართ მეტნი და უნდა გავუწიოთ წინააღმდეგობა ამ რეჟიმს და მივაღწიოთ მთავარს - დეოლიგარქიზაციას, რაც დაანგრევს ამ რეჟიმს", - ამბობს ხოშტარია.
დახურვა