ვლადიმერ პუტინმა რუსეთში "ქართული დიასპორის" ხელმძღვანელი დავით ცეცხლაძე პრეზიდენტთან არსებული ერთაშორისი ურთიერთობების საბჭოს შემადგენლობაში შეიყვანა.
შესაბამის ბრძანებაში ცვლილებას რუსეთის პრეზიდენტმა ხელი დღეს, 4 ოქტომბერს მოაწერა - ინფორმაციას რუსული პროპაგანდისტული და სამთავრობო მედია TASS აქვეყნებს.
"საბჭოს შემადგენლობაში შეყვანილ იქნეს დავით ცეცხლაძე - საზოგადოებრივი ორგანიზაციის "რუსეთში ქართული ფედერალური ნაციონალ-კულტურული ავტონომიის" პრეზიდენტი", - ნათქვამია ბრძანებაში.
რუსეთის პრეზიდენტთან არსებული ერთაშორისი ურთიერთობების საბჭო 2012 წელს შეიქმნა, მისი მიზანი - "რუსეთში ეთნიკური ურთიერთობების სფეროში სახელმწიფო პოლიტიკის გაუმჯობესებაა".
რუსული მედიის თანახმად, აქამდე "ქართული დიასპორის" წარმომადგენელი საბჭოს შემადგენლობაში არ შედიოდა.
დავით ცეცხლაძე "რუსეთში ქართული ფედერალური ნაციონალ-კულტურული ავტონომიის" ხელმძღვანელის თანამდებობას 2021 წლიდან იკავებს.
ვლადიმერ პუტინის მხარდამჭერი ბიზნესმენი დავით ცეცხლაძე აქტიურად თანამშრომლობს რუსეთის ხელისუფლებასთან, ის ემხრობა რუსეთის ომს უკრაინაში. ასევე, გასულ თვეებში ის აქებდა ქართული ოცნების პოლიტიკასაც.
დახურვა