ლიეტუვის საგარეო საქმეთა სამინისტრო საქართველოში ჩატარებულ საპარლამენტო არჩევნებზე განცხადებას ავრცელებს და საერთაშორისო გამოძიების აუცილებლობაზე მიუთითებს.
სამინისტრო აღნიშნავს, რომ არჩევნებზე გამოვლინდა უპრეცედენტო ინციდენტები და სისტემური დარღვევები, როგორც კამპანიის განმავლობაში, ასევე კენჭისყრის დღეს.
სამინისტრო საუბრობს ხმების მოსყიდვის ბრალდებებზე, ასევე საარჩევნო უბნებზე ფიზიკური ძალადობის შემთხვევასა და თავდასხმებზე დამოუკიდებელი დამკვირვებლების მიმართ.
"ეს დარღვევები არაერთმა საერთაშორისო და ადგილობრივმა დამკვირვებელმა დააფიქსირა. დარღვევების მასშტაბი და სისტემური ხასიათი, ასევე მკვეთრი შეუსაბამობა დამოუკიდებელ ეგზიტპოლსა და გამოცხადებულ შედეგს შორის სერიოზული კითხვის ნიშნის ქვეშ აყენებს ამ არჩევნების ლეგიტიმურობასა და საბოლოო შედეგს. საქართველოს პრეზიდენტმა უარი თქვა შედეგის აღიარებაზე. ამ კონტექსტში, ლიეტუვისთვის რთულია ამ არჩევნების, როგორც თავისუფალი და სამართლიანი არჩევნების აღიარება.
ქართველი ხალხის დემოკრატიული უფლებები მხარდაჭერილი უნდა იყოს. ამ უფლებების შელახვის ნებისმიერი მცდელობა სრულიად მიუღებელია. ჩვენ მოვუწოდებთ სასწრაფოდ ჩატარდეს დამოუკიდებელი საერთაშორისო გამოძიება ამ არჩევნებისა და მათ დროს დაფიქსირებული ყველა დარღვევის შესახებ", - ნათქვამია განცხადებაში.
ლიეტუვის საგარეო საქმეთა სამინისტრო ასევე აღნიშნავს, რომ საქართველოს ევროკავშირში გაწევრიანების პროცესი უკვე შეჩერებულია "საკანონმდებლო კანონმდებლობის მიღების გამო" და აღნიშნავს, რომ არჩევნებზე მომხდარი დარღვევები "კიდევ უფრო ართულებს ამ გზას". განცხადებაში ასევე საუბარია "დამატებით შემზღუდავი ზომების განხილვაზე იმ პირთა მიმართ, რომლებიც პასუხისმგებელნი არიან არჩევნების გაყალბებაზე".
"შედეგებზე პასუხისმგებლობა ეკისრება მმართველ პარტიას და მის ლიდერებს. ჩვენ გვჯერა, რომ EU გააგრძელებს პოლიტიკური კონტაქტების შეჩერებას საქართველოსთან, საქართველოს ხელისუფლებას გაუყინავს ფინანსურ დახმარებას. მეტიც, აუცილებლად უნდა იყოს განხილული დამატებითი შემზღუდავი ზომები იმ პირების მიმართ, რომლებიც პასუხისმგებელი არიან არჩევნების გაყალბებაზე.
ლიეტუვა გააგრძელებს ქართველი ხალხისა და მათი ევროპული არჩევანის გვერდით დგომას. ჩვენ ასევე გავაგრძელებთ საქართველოს დამოუკიდებლობის, სუვერენიტეტისა და ტერიტორიული მთლიანობის ურყევად მხარდაჭერას მის საერთაშორისოდ აღიარებულ საზღვრებში", - ნათქვამია განცხადებაში.
დახურვა