დიდი ბრიტანეთის თავდაცვის მინისტრმა, ჯონ ჰილმა განაცხადა, რომ დიდი ბრიტანეთი და აშშ 1-წლიანი ინვესტიციის ფარგლებში უკრაინის საჰაერო თავდაცვის გასაძლიერებლად 600 მილიონ ფუნტ სტერლინგს გამოჰყოფს.
მინისტრმა აღნიშნა, რომ პუტინი აგრძელებს სასტიკ თავდასხმებს უკრაინაზე.
„მხოლოდ ბოლო ორი თვის განმავლობაში განხორციელდა 20,000 შეტევა დრონებითა და რაკეტებით. ჩვენ კიდევ უფრო უნდა გავაძლიეროთ ჩვენი მხარდაჭერის სიგნალი პუტინზე ზეწოლის მოსახდენად,“ — განაცხადა ჰილმა.
მან ხაზი გაუსვა, რომ უკრაინელები დაცულნი უნდა იყვნენ ზამთრის თვეების განმავლობაშიც.
„საჰაერო თავდაცვა აბსოლუტური პრიორიტეტია. ამიტომ დღეს მე შემიძლია დავადასტურო აშშ-ისა და დიდი ბრიტანეთის ყველაზე დიდი, ერთწლიანი ინვესტიცია უკრაინის საჰაერო თავდაცვაში. ეს არის 600 მილიონი ფუნტი. ათასობით საჰაერო თავდაცვის სისტემა, რაკეტა და ავტომატიზებული კოშკურა დრონების ჩამოსაგდებად. მიწოდება მიმდინარეობს ახლა და გაგრძელდება 2026 წლამდე.“
მან ასევე გამოაცხადა, რომ დიდ ბრიტანეთში მალე დაიწყება Octopus-ის ტიპის ჩამჭრელი დრონების წარმოება და უკრაინაში ყოველთვიურად ათასობით ერთეულის გაგზავნა.
„ჩვენი მისია ნათელია: მხარი დავუჭიროთ ბრძოლას დღეს. უზრუნველვყოთ მშვიდობა ხვალ. და თუ პუტინი გადაწყვეტს გააგრძელოს ეს ომი მომავალ წელსაც, ჩვენი გზავნილი მოსკოვისთვის მკაფიოა: საკონტაქტო ჯგუფი მხოლოდ გაძლიერდება, უფრო გაერთიანდება და 2026 წლის განმავლობაში კიდევ უფრო მეტ აღჭურვილობას გადასცემს უკრაინელ მებრძოლებს,“ — განაცხადა ჰილმა.
დახურვა