სომხეთის ანტიკორუფციულმა კომიტეტმა ექვსი ადამიანი დააკავა, მათ შორის ქვეყნის ყოფილი პრეზიდენტი რობერტ ქოჩარიანი და მისი ვაჟი სედრაკ ქოჩარიანი. ამის შესახებ კომიტეტი აცხადებს.
უწყების ინფორმაციით, გამოძიება ეხება სახელმწიფო საკუთრებიდან უძრავი ქონების სავარაუდო უკანონო გატანასა და საბაზრო ღირებულებაზე მნიშვნელოვნად დაბალ ფასად შეძენას. კომიტეტის ცნობით, ქონების რეალური მფლობელობისა და წარმომავლობის დასამალად გამოყენებული იყო დაკავშირებული კომპანიები და ფიქტიური გარიგებები.
გამოძიების ფარგლებში სამართალდამცველები ჩხრეკისა და სხვა საგამოძიებო მოქმედებებს ატარებენ Orange Fitness-სა და Play City-ში, ასევე რამდენიმე კომპანიის ხელმძღვანელთა საცხოვრებელ ბინებში.
ანტიკორუფციული კომიტეტის განცხადებით, ასევე მიმდინარეობს გამოძიება ქოჩარიანის ვაჟის სახელზე 2001-2019 წლებში განხორციელებულ მსხვილ ფულად გადარიცხვებთან და სომხეთსა და საზღვარგარეთ უძრავი ქონების შეძენასთან დაკავშირებით.
უწყების ცნობით, შესაძლო ქონების გასხვისების თავიდან ასაცილებლად შესაბამისი აქტივების დაყადაღების პროცედურებიც მიმდინარეობს.
დახურვა