ნიდერლანდები უკრაინის სამხედრო მხარდაჭერას აძლიერებს და კიევს დამატებით 500 მილიონი ევროს ღირებულების სამხედრო დახმარების პაკეტს გადასცემს. ამის შესახებ ნიდერლანდების პრემიერ-მინისტრმა რობ იეტენმა უკრაინის პრეზიდენტ ვოლოდიმირ ზელენსკისთან გამართული ერთობლივი პრესკონფერენციის დროს განაცხადა.
იეტენის განცხადებით, ახალი დახმარების პაკეტი, სხვა შეიარაღებასთან ერთად, საჰაერო თავდაცვის საშუალებებსა და დრონებს მოიცავს. აღნიშნული აღჭურვილობა უკრაინას რუსეთის უწყვეტი საჰაერო თავდასხმებისგან დაცვაში უნდა დაეხმაროს.
ნიდერლანდების მთავრობის მეთაურმა ყურადღება გაამახვილა რუსეთის მხრიდან უკრაინის წინააღმდეგ მიმდინარე აგრესიაზეც. მისი თქმით, ამ ეტაპზე არ არსებობს ნიშნები იმისა, რომ მოსკოვი უკრაინელი მოსახლეობის წინააღმდეგ ტერორის შეწყვეტისთვის მზად არის.
რობ იეტენის შეფასებით, რუსეთი ცდილობს, დაასუსტოს უკრაინა, შეარყიოს მისი საბრძოლო სულისკვეთება, საზოგადოება და ეკონომიკა, თუმცა ამ მიზანს ვერ მიაღწევს უკრაინელების გამძლეობისა და სიმტკიცის გამო.
„ჩვენ, როგორც მოკავშირეებს, შემდგომშიც უნდა გვესმოდეს, რომ ჩვენს უწყვეტ მხარდაჭერას გადამწყვეტი მნიშვნელობა აქვს“, – განაცხადა ნიდერლანდების პრემიერ-მინისტრმა.
მან ასევე აღნიშნა, რომ ნიდერლანდები მხარს უჭერს ყველა ძალისხმევას, რომელსაც შეუძლია ხელი შეუწყოს უკრაინისთვის მტკიცე და სამართლიანი მშვიდობის მიღწევას.
ახალი სამხედრო დახმარების პაკეტი ნიდერლანდების მიერ უკრაინის მხარდაჭერის გაგრძელების კიდევ ერთი ნაბიჯია. საჰაერო თავდაცვის საშუალებები და დრონები კიევისთვის განსაკუთრებით მნიშვნელოვანია რუსეთის საჰაერო იერიშების მოგერიებისა და ქვეყნის თავდაცვითი შესაძლებლობების გასაძლიერებლად.
დახურვა