კასპის წმინდა გიორგის ტაძრის და ე.წ საზღვრისპირა სოფლების ღვთისმსახური, მღვდელი ლევან ჯიქური კორუფციასა და თანამდებობის პირების პასუხისმგებლობაზე წერს.
მისი შეფასებით, ქვეყანაში არსებული დაბალი შემოსავლების მიუხედავად, მოსახლეობის დიდი ნაწილი პატიოსნად ცხოვრობს, მაშინ როცა კორუფციაში მხილებული მაღალშემოსავლიანი პირები ხშირად სათანადო პასუხისმგებლობას არ იღებენ.
მისი თქმით, რეალობაში ქრთამის აღებისა და კორუფციის ფაქტებზე სწორედ მაღალი შემოსავლის მქონე პირები ხდებიან პასუხისმგებლობის ობიექტები, თუმცა სასჯელის მოხდის შემდეგ ხშირად კვლავ შეძლებულად ცხოვრობენ.
"მაღალ თანამდებობზე მყოფებს დიდ ხელფასებს იმიტომ ვაძლევთ, რომ ფული აღარ მოიპარონო. ამ ლოგიკას თუ გავყვებით, მოსახლეობის უმეტესობას, ისეთი დაბალი შემოსავალი გვაქვს, ჩვენ კი არ უნდა ვიპარავდეთ, კარგა ხნის გავარდნილები უნდა ვიყვეთ ტყეში ყაჩაღებად.
არადა რეალობა როგორია, ქრთამებზე და კორუფციაზე, ზუსტად იმათ იჭერენ ვისაც დიდი შემოსავალი აქვს, შედიან ციხეებში, მალე გამოდიან და ცხოვრობენ მეფეებივით. ჩვენ კი, რაც გვაქვს იმას ვჯერდებით და ვართ სიდუხჭირეში.
ზოგს უკვირს რა უნდა სამი მილიონი კაცის მიხედვასო, ამდენი წურბელა რომ გეყოლება ქვეყანაში, რამდენს აიტანს, საუდის არაბეთი ხო არაა? იმიტომ ვერ გაიმართა წელში. დაინდეთ ქვეყანა, სამსჯავროზე ნებისმიერ ადამიანს, სახლში წაღებულ ყველა არასწორ კაპიკზე, აგებინებენ პასუხს", - წერს მამა ლევანი.
