მოზარდის თვითმკვლელობის მცდელობის ფაქტზე გამოძიების დასრულებამდე შსს-მ დიდუბე - ჩუღურეთის სამმართველოს 1-ლი განყოფილების უფროსის მოადგილეს და გამომძიებელს უფელბამოსილება შეუჩერა. რაც შეეხება თავად არასრულწლოვანს, ბიჭის ჯანმრთელობის მდგომარეობა შედარებით გაუმჯობესდა.
მოზარდის მკურნალობის პროცესში კი ქართველ ექიმებთან ერთად, ისრაელის წამყვანი კლინიკების სპეციალისტებიც ჩაერთვებიან. მოზარდის თვითმკვლელობამდე მიყვანის ფაქტზე გამოძიება სისხლის სამართლის კოდექსის 115-ე მუხლით მიმდინარეობს. საგამოძიებო ღონისძიებებს სახელმწიფო ინსპექტორის სამსახური ატარებს.
შეგახსენებთ, რომ რამდენიმე დღის წინ 15 წლის მოზარდმა თვითმკვლელობა სცადა და მე-9 სართულიდან გადმოხტა. თვითმკვლელობის მცდელობას წინ უძღოდა „მწვანე სკოლაში" მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. კერძოდ, მოზარდმა სკოლის შენობაზე წარწერა დატოვა, რის გამოც სკოლის ადმინისტრაციამ პოლიცია გამოიძახა. ადვოკატის ინფორმაციით, მოზარდზე პოლიციაში ფსიქოლოგიური ზეწოლა განხორციელდა.
დახურვა