ევროპარლამენტარები მარტის თვეში თბილისში ჩამოსვლას აპირებენ. ასევე „ფორმულას“ ინიფორმაციით, თბილისში ვიზიტს გეგმავს საქართველოზე მომხსენებელი, ესტონეთის საგარეო საქმეთა მინისტრი სვენ მიქსერი. ოპოზიციისა და ხელისუფლების წარმომადგენლებთან შეხვედრების პარალელურად, მათ შესაძლოა ის პოლიტიკური ლიდერებიც მოინახულონ, რომლებმაც ბრიუსელში გაგზავნილ წერილს ხელი მოაწერეს და ამ დრომდე საპატიმროებში იმყოფებიან. ასეთი შედეგით ბრუნდებიან ბრიუსელიდან ოპოზიციონერი ლიდერი ქალები.
როგორც „ფორმულას“ „ნაციონალური მოძრაობის“ წევრმა სალომე სამადაშვილმა განუცხადა, ევროპარლამენტში ოპოზიციონერების შეხვედრის მთავარი თემა, საქართველოს მიერ იმ ვალდებულებების შესრულება, რომელიც ქვეყანას ევროკავშირის მიმართ აქვს აღებული.
„ჩვენი შეხვედრის მთავარი თემა დღეს დიპლომატიურ სამსახურში იყო საქართველოს მხრიდან იმ ვალდებულებების შესრულება, რომელიც ევროკავშირის მიმართ აქვს აღებული. ვისაუბრეთ ეუთო-ს დასკვნაზე. მე იმედი მაქვს, რომ ევროკავშირის პოზიცია მოლაპარაკებებზე, რომელიც თბილისში უნდა გაიმართოს, იქნება მიმართული იქითკენ, რომ რაც შეიძლება მალე იქნას მიღწეული კონსესუსი, რადგან ამ აუცილებლობას ხედავენ ჩვენი ევროპელი კოლეგები“, - განაცხადა სამადაშვილმა.
„ევროპული საქართველოს“ წევრმა ელენე ხოშტარიამ კი „ფორმულას“ განუცხადა, რომ დეპუტატებმა ევროპარლამენტარებს დეტალური ინფორმაცია მიაწოდეს საქართველოში არსებულ პოლიტიკურ დევნაზე.
„ჩვენ კიდევ უფრო დეტალურად მივაწოდეთ ინფორმაცია პოლიტიკურ დევნაზე. მნიშვნელოვანია ამ საქმეებში ყველა ნიუანსები. ქართულ ოცნებას შეიძლება იმედი აქვს, რომ მათი შეკერილი საქმეების ყველა დეტალში ვერ გაერკვევიან ადამიანები. ვფიქრობ, ამ მიმართულებით რეაგირება იქნება. წერილი, რომელიც პრაქტიკულად, ამ პოლიტიკური დევნის მთელ სურათს ასახავს, ყველა დიდი ყურადღებით მოეკიდა. პოლიტიკური დევნა და მოპარული არჩევნები არის ის ორი მთავარი თემა, რომელიც აქედან დიდ ყურადღებას იმსახურებს“, - განაცხადა ხოშტარიამ.
„ლელო საქართველოსთვის“ წევრი ანა ნაცვლიშვილი აცხადებს, რომ აუცილებელია საქართველოში საარჩევნო სისტემასთან დაკავშირებით მოხდეს შეთანხმება და ევროპარლამენტში ამის ფასი ძალიან კარგად ესმით.
„რასაკვირველია, ჩვენს პარტნიორებს კარგად ესმით თანხმობის ფასი. ეს თანხმობა უნდა იყოს რეალური. ხელისუფლება არ აჩვენებს შინაარსობრივ მზაობას, რომ არჩევნები ჩატარდეს სამართლიანი სისტემით. ახლა საქართველოს ამოცანა არის ის, რომ შემდეგი მმართველობა არ დატრიალდეს ამ ჩაკეტილ წრეზე და არ მივიღოთ ისევ ძალაუფლებით გაყოყოჩებული მმართველი ძალა“, - განაცხადა ნაცვლიშვილმა.
„გამარჯვებული საქართველოს“ წევრის ანა რეხვიაშვილის თქმით, ბიძინა ივანიშვილის ხელისუფლების მიმართ, ევროპარლამენტიდან მოთხოვნები სულ უფრო მკაცრდება.
„ივანიშვილის ხელისუფლების მიმართ სულ უფრო მკაცრდება მოთხოვნები განცხადებებსა და რეზოლუციებში. ჩვენთვის ცნობილია, რომ უახლოეს მომავალში საქართველოს ეწვევა ევროპარლამენტართა ჯგუფი, რომლებიც დაგეგმავენ პოლიტპატიმართა მონახულებას ციხეში. ეს იქნება ხელისუფლების მიმართ მკაფიო გზავნილი, რომ ევროპული და პოლიტიკური დევნა კატეგორიულად მიუღებელია“, - განაცხადა რეხვიაშვილმა.
რაც შეეხება ევროპარლამენტში ოპოზიციური პარტიების ლიდერების მიერ ჩატანილ წერილს. შეგახსენებთ, რომ „ფორმულანიუსმა“ ექსკლუზიურად მოიპოვა დოკუმენტი, რომლითაც ევროპული სტრუქტურების უმაღლესი თანამდებობის პირებს განსხვავებული პოლიტიკური ხედვისა და პრეფერენციის პოლიტიკური ლიდერები და მედიის წარმომადგენლები მიმართავენ, მათ შორის წერილს ხელს აწერენ საპატიმროში მყოფი პოლიტიკოსები და სამოქალაქო აქტივისტები.
წერილის შინაარსზე განცხადებები გაკეთდა ბრიუსელში. იქ ქართველ ოპოზიციონერ ლიდერ ქალთა დელეგაცია იმყოფება, წერილი ევროკავშირის დედაქალაქში სწორედ მათ ჩაიტანეს. ოპოზიციონერებს ევროპულ სტრუქტურებში შეხვედრები მთელი დღის განმავლობაში აქვთ.
დახურვა