ოპოზიცია „ქართულ ოცნებას“ საარჩევნო სისტემის ახალ ვარიანტს შესთავაზებს, ხელისუფლებაში კი პროექტს ჯერ არ იცნობენ, მაგრამ უკვე წინააღმდეგები არიან. ახალი შეთავაზების შესახებ ნინო ბურჯანაძემ სოფო ზურაბიანის „პოლიტიკის ფორმულაში“ განაცხადა. ბურჯანაძეს დეტალები არ დაუკონკრეტებია, თუმცა აღნიშნა, რომ საუბარია გერმანული მოდელის მოდიფიცირებულ ვარიანტზე, რომელშიც მაჟორიტარების რაოდენობა შემცირებული იქნება. ამ გზით, ოპოზიცია პარლამენტში პოლიტიკური კრიზისების შექმნის რისკების შემცირებას ვარაუდობს, ამავდროულად, მაქსიმალურად დაცული იქნება პროპორციულობის პრინციპი.
ხელისუფლების წარმომადგენლები კომპრომისზე წასვლას კვლავ არ აპირებენ. მათი თქმით, მმართველი პარტიის მხრიდან გაკეთებული შეთავაზება 100/50-ზე არის ბოლო შეთავაზება მათი მხრიდან, ხელისუფლების წარმომადგენლები ასევე აცხადებენ იმასაც, რომ პარტია ოპოზიციასთან დათმობებზე უკვე წავიდა და ახლა ჯერი ოპოზიციაზეა.
„გაიმართა არაერთი რაუნდი ოპოზიციასთან მოლაპარაკებების, ჩვენი საერთაშორისო პარტნიორობის მონაწილეობით. სამწუხაროდ, მათ მიერ წარმოდგენილი წინადადებები საერთოდ არ იყო თანხვედრაში არც კონსტიტუციასთან და არც იმ რეალობასთან, რომელშიც ჩვენ ვცხოვრობთ, შესაბამისად, ჩვენ შევთავაზეთ წინადადება, რომელიც ასახავს რეალურად და ძალიან რაციონალურად პროპორციულობის გაზრდის პრინციპს, ბურთი არის ოპოზიციის მოედანზე. თქვენ იცით ჩვენი შეთავაზების შესახებ და შესაბამისად, ველოდებით, თუ რა პოზიცია ექნება ოპოზიციას ამასთან დაკაშირებით“, - განაცხადა ირაკლი ბერაიამ.
პარლამენტის თავჯდომარემ ასევე განაცხადა, რომ ოპოზიციას შეთანხმებამდე ვადა თებერვლის ბოლომდე აქვს, წინააღმდეგ შემთხვევაში, არჩევნებისთვის საარჩევნო სისტემის ცვლილება ვერ მოხერხდება. თალაკვაძის განცხადებას ოპოზიციის წარმომადგენლებიც გამოეხმაურნენ, „ახალი საქართველოს“ ლიდერის, გიორგი ვაშაძის თქმით, თებერვლის ბოლომდე ვადა „ქართულ ოცნებას“ აქვს, ვინაიდან მისი თქმით, არჩევნებში გამარჯვების შანსი მმართველ პარტიას არცერთი სისტემით არ აქვს.
„მე, მაგალითად, ვფიქრობ, რომ თებერვლის ბოლომდე ვადა აქვს „ქართულ ოცნებას“, იმიტომ რომ მათ მიერ არჩევნების მოგების შანსი ნულის ტოლფასია. მათ უნდა გადაწყვიტონ, სახეს შეინარჩუნებენ თუ არა. მაქსიმუმ, 30% დღეის მონაცემებით, რაც შეიძლება მათ აიღონ, ყველა მაჟორიტარულ ოლქს წააგებენ. ჩვენი მიზანია, რომ ერთპარტიული და ერთი ძალის მმართველობა დავასრულოთ ამ ქვეყანაში, ამიტომ გვინდა კოალიციური მმართველობა პროპორციული საარჩევნო სისტემა“, - განაცხადა გიორგი ვაშაძემ.
„ერთიანი ნაციონალური ოძრაობის“ წევრის, ზაალ უდუმაშვილის თქმით, იმ შემთხვევაში, თუ მმართველი გუნდი ახალი შეთავაზებით არ მივა მოლაპარაკებებზე, შეხვედრები აზრს დაკარგავს.
„თალაკვაძის მიერ შემოთავაზებული ვარიანტი არ იყო ერთადერთი, რომელიც უნდა განხილულიყო. ჩვენ შეხვედრების პირველ დღეზე დავაყენეთ ჩვენი წინადადება, რომელზეც მოჭრილი უარი იყო ნათქვამი. ეს არის მათი გადასაწყვეტი: ახლა ან მოვლენ ნორმალური წინადადებით, იმ წინადადებით, რომელიც შეესაბამება პროპორციულ არჩევნებს ქვეყანაში, წინააღმდეგ შემთხვევაში, მოლაპარაკებები აზრს დაკარგავს“, - განაცხადა ზაალ უდუმაშვილმა.
„ერთიანი საქართველოს“ ლიდერმა ნინო ბურჯანაძემ ოპოზიციის ახალ ვარიანტებზე ისაუბრა, მისი თქმით, ოპოზიციის მორიგი საარჩევნო სისტემის ვარიანტი ახლოს არის „ქართული ოცნების“ მიერ შეთავაზებულ ვარიანტთან, მაგრამ ის გაცილებით უფრო პროპორციულ წარმომადგენლობას უზრუნველყოფს.
„ჩვენ ვართ ძალიან კონსტრუქციულად განწყობილი, არანაირი სურვილი არჩევნების ჩაშლის, არჩევნებში არ მონაწილეობის არ გვაქვს, მაგრამ არც იმის სურვილი არ გვაქვს, რომ ბრძოლის გარეშე გამარჯვება მოიპოვოს ქართულმა ოცნებამ. ჩვენ გვაქვს რამდენიმე ვარიანტი, რაც ახლოს არის იმ ვარიანტთან, რომელიც შემოგვთავაზა ქართულმა ოცნებამ, მაგრამ გაცილებით უფრო პროპორციულ წარმომადგენლობას უზრუნველყოფს პარლამენტში“, - განაცხადა ნინო ბურჯანაძემ.
დახურვა