საქართველოს პრემიერ-მინისტრმა გიორგი გახარიამ და NDI-ის პრეზიდენტმა დერეკ მიჩელმა მთავრობის ადმინისტრაციაში გამართულ შეხვედრაზე ქვეყანაში NDI-ის საქმიანობის სხვადასხვა მიმართულებები განიხილეს.
საუბრისას განსაკუთრებით აღინიშნა აშშ-საქართველოს სტრატეგიული პარტნიორობის მაღალი დონე.
ყურადღება გამახვილდა ქვეყანაში საარჩევნო წლის განმავლობაში კოორდინირებული თანამშრომლობის აუცილებლობაზე.
შეხვედრაზე ხაზი გაესვა NDI-ის პრეზიდენტის დროულ ვიზიტს საქართველოში, რამდენადაც, საარჩევნო კამპანია მალე აქტიურ ფაზაში შევა.
საუბარი შეეხო ადგილობრივი თვითმართველობებისა და წარმომადგენლობითი ორგანოების გაძლიერების მნიშვნელობას და ამ მიმართულებით, NDI-ის მიერ გაწეულ საქმიანობას. აღინიშნა, რომ მნიშვნელოვანია, არ მოხდეს საქმიანობის კონკრეტული ასპექტების პოლიტიზირება, ვინაიდან, ამან, შესაძლოა, ხელი შეუშალოს იმ მიზნების მიღწევას, რომლებზეც ორიენტირებულია ეროვნულ-დემოკრატიული ინსტიტუტის მხარდაჭერით მიმდინარე პროექტები.
მხარეების შეფასებით, საარჩევნოდ მნიშვნელოვანია მაღალი პოლარიზაციის დონის შემცირება და ამ პროცესში ყველა მხარეს თავისი როლი აქვს.
შეხვედრას საქართველოს მთავრობის ადმინისტრაციის უფროსი ნათია მეზვრიშვილი და პრემიერ-მინისტრის მრჩეველი საერთაშორისო ურთიერთობების საკითხებში ირაკლი ჩიქოვანი ესწრებოდნენ.
ინფორმაციას მთავრობის ადმინისტრაცია ავრცელებს.
დახურვა