მთავრობის ადმინისტრაციაში კორონავირუსის გავრცელების პრევენციისთვის შექმნილი უწყებათაშორისი კომისიის შეხვედრა მიმდინარეობს. კომისიას პრემიერ-მინისტრი გიორგი გახარია ხელმძღვანელობს და მინისტრთა კაბინეტთან ერთად, მასში მონაწილეობას თბილისის მერი და დაავადებათა კონტროლის ეროვნული ცენტრის წარმომადგენლები იღებენ.
პარლამენტის ჯანდაცვის კომიტეტის თავმჯდომარე დიმიტრი ხუნდაძე ამბობს, რომ მთავრობა მსჯელობს საყოველთაო კარანტინის რეჟიმის ამოქმედებაზე, რომელიც ამ ეტაპზე მხოლოდ მარნეულსა და ბოლნისში მოქმედებს. ხუნდაძე არ გამორიცხავს, რომ ამ რეჟიმის ამოქმედება აღდგომამდე გახდეს საჭირო. დეპუტატის განმარტებით, ამის საჭიროება იმ შემთხვევაში დადგება, თუ ქვეყანაში ინფიცირებულთა რაოდენობა მოიმატებს.
გარდა ამისა, ხუნდაძის თქმით, მთავრობაზე ეკონომიკური მდგომარეობის გასაუმჯობესებლად გარკვეულ ინიციატივებზეც მსჯელობს, თუმცა მას კონკრეტულ ინიციატივებზე არ უსაუბრია.
"მიუხედავად იმისა, რომ ჩვენ ვიმყოფებით უკვე პრეკრიზისულ ფაზაში და ძალიან მალე შევალთ კრიზისულ პერიოდში, ვითარება კონტროლს ექვემდებარება. პანიკის საფუძველი ნამდვილად არ არის, მაგრამ ჩვენ ყველაფერი უნდა გავაკეთოთ იმისთვის, რომ შემთხვევების ნახტომისებური ზრდა არ მივიღოთ. თუ არ იქნა ადეკვატური ქცევა საზოგადოების და ეპიდვითარება გართულდა, საყოველთაო კარანტინის შემოღების საკითხი დადგება", - განაცხადა ხუნდაძემ.
შეგახენებთ, რომ საქართველოში კორონავირუსით ინფიცირების სულ 81 შემთხვევა დადასტურდა. 13 პაციენტი უკვე განიკურნა, ხოლო საკარანტინო ზონაში 4 505 მოქალაქე იმყოფება.
დახურვა