ხვალიდან ჯანდაცვის სამინისტრო ახალი ალგორითმით იმუშავებს. ალგორითმის მიხედვით განისაზღვრება, თუ რომელი სახის ტესტი პაციენტების რომელ ჯგუფში უნდა იქნას გამოყენებული. ამ თემაზე საბოლოო კონსულტაციები დღეს დასრულდება, დეტალები კი საზოგადოებისთვის ხვალ გახდება ცნობილი. ამის შესახებ ჯანდაცვის მინისტრის მოადგილემ, თამარ გაბუნიამ დღეს გამართულ ბრიფინგზე ისაუბრა.
„2000 სწრაფი ტესტი, ანტიგენზე დამყარებული რომელიც საჭიროებს ,მარტივ ანალიზატორს იმისთვის რომ PCR მეთოდით შესრულდეს ტესტირება, ქვეყანაში ჩამოვიდა კვირას. ჩვენ დღეს გვექნება ექსპერტების ჯგუფთან შეხვედრა, იმისთვის რომ განვსაზღვროთ ზუსტად რომელ კლინიკაში მოხდება ამ ტესტების გამოყენება. ასევე არის 4000 ანტისხეულზე დამყარებული ტესტი, რომელიც პასუხებს იძლევა უფრო გვიან, თუმცა ორივე ტესტს აქვს თავისი ადგილი დიაგნოსტიკურ ალგორითმში. ახალი ალოგრითმი მზად არის, დღეს იგეგმება საბოლოო საკონსულტაციო შეხვედრა, სადაც ლაბორატორიის ექსპერტებისა და კლინიკების ექსპერტების ჯგუფი შეხვედა ერთმანეთს და კიდევ ერთხელ შევთანხმდებით. ხვალიდან უკვე ალგორითმი მიიღებს ფორმალურ სახეს, მინისტრის ბრძანებით იქნება დამტკიცებული. იქ არის დეტალურად განსაზღვრული რომელი სახის ტესტი რომელი პაციენტების ჯგუფში უნდა იყოს გამოყენებული და რა ეტაპზე“,-განაცხადა თამარ გაბუნიამ.
დახურვა