თბილისის ზღვის ჰოსპიტალის კრიტიკული მედიცინის დეპარტამენტის ხელმძღვანელის მარეხი ბექაიას განცხადებით, ჩატარებული 30 კვლევიდან, 26 პაციენტს, კორონავირუსი არ დაუდასტურდა.
ბექაიას განმარტებით, კიდევ 4 პაციენტის ანალიზის კვლევა გრძელდება და მათი პასუხი დღის ბოლომდე გახდება ცნობილი.
„ამჟამად კლინიკაში 54 პაციენტი იმყოფება. გუშინ კვლევა 30 პაციენტზე ჩატარდა და მათგან 26 უარყოფითი პასუხია მიღებული. 4 შემთხვევაზე კვლევა გრძელდება და მათი პასუხი დღეს იქნება ცნობილი. დაწყებულია პაციენტების კლინიკებსა და საკარანტინო ზონებში გადაყვანა. ღამით 5 პაციენტი გადაიყვანეს, ხოლო დანარჩენი პაციენტები დღის განმავლობაში გადავლენ. პაციენტების ზოგადი მდგომარეობა საშუალო და მსუბუქი სიმძიმისაა. ბოლო 4 დღეა, ჩვენს კლინიკაში კორონავირუსზე დადებითი პასუხი არცერთ პაციენტს აქვს“,- განაცხადა ბექაიამ.
შეგახსენებთ, რომ საქართველოში კიდევ 6 ადამიანი დაინფიცირდა და მათი რიცხვი უკვე 431-ს შეადგენს.
დახურვა