ჯანდაცვის სფეროს სპეციალისტები დღეს მასობრივი ტესტირების აუცილებლობაზე კიდევ ერთხელ საუბრობენ. ისინი ჯანდაცვის სამინისტროს, ტესტირების ალგორითმის არაეფექტური შესრულების გამო აკრიტიკებენ და ამბობენ, რომ უწყება ამ თემას მონიტორინგს არ უწევს. ამის ერთ-ერთ მაგალითად კი სპეციალისტებს, თეთრი წყარო მოჰყავთ, სადაც ერთ-ერთი ინფიცირებული ექიმია.
ექსპერტები ასევე აცხადებენ, რომ პროტოკოლის მიხედვით, ტესტირება 50 000 ადამიანს უნდა ჩაუტარდეს, თუმცა მათი თქმით, სამიზნე ჯგუფზე ტესტების ჩატარება მინიმალური რაოდენობით ხდება.
„უკეთეს შემთხვევაშიც კი ყველაზე დიდი 800-900 ტესტამდე კეთდება ბოლო დღეების განმავლობაში. ამ ალგორითმითაც კი ძალიან დაბალია ტესტირების მაჩვენებელი. თითქმის 50 000 ადამიანის ტესტირებაა საჭირო ამ ალგორითმის მიხედვითაც კი. მაგრამ რა თქმა უნდა სამიზნე ჯგუფების მოცვის მერე ეს უნდა გაფართოვდეს და ისეთივე ფართო უნდა იყოს ეს ტესტირება დიაგნოსტიკა და კვლევები, როგორიც იყო სამხრეთ კორეაში, როგორიც ახლა არის გერმანიაში“,-განაცხადა სერგო ჩიხლაძემ.
ექსპერტთა ნაწილი ასევე მიიჩნევს რომ, აუცილებელია ტესტის ჩატარება ანტისხეულებზეც იმისთვის, რომ დადგინდეს სტატისტიკა, რეალურად რამდენი ადამიანი იყო კორონავირუსით დაინფიცირებული. ჯანდაცვის ექსპერტის, ვატო სურგულაძის თქმით, ამ სტატისტიკის დადგენა სახელმწიფოს დაეხმარება ეკონომიკურ ნაწილში გარკვეული შეზღუდვები შეამსუბუქოს.
„ვერ დააორგანიზეს ამის გაკეთება ვერ ჩამოიტანეს ის რაოდენობა, არის მართვის პრობლემა.სტატისტიკა მნიშვნელოვანია ე.წ ანტისხეულებზე რამდენ ადამიანს აქვს გადატანილი. ეს მოგვცემს რაღაცას ე.წ. ინდიკატორს, შეგვიძლია გავხსნათ თუ არა ეკონომიკა, სად შეგვიძლია გავხსნათ, უნდა იყოს დასაბუთებული რეალურად რამდენი ადამიანი გვყავს, თორე მთავრობის მეექვსე გრძნობაზე უნდა ვიყოთ დამოკიდებული გავხსნათ ეკონომიკა თუ არ გავხსნათ“,-განაცხადა ვატო სურგულაძემ.
მედიკოსების ნაწილი ასევე პროტოკოლში არსებულ ხარვეზებზეც საუბრობენ. ისინი მიიჩნევენ, რომ მნიშვნელოვანია მედპერსონალის შესაბამისი გადამზადება, რათა ისინი მზად იყვენენ კოვიდ ინფიცირებული პაციენტის მისაღებად. ინფექციონისტი, მაია ბუწაშვილი ასევე აცხადებს, რომ მნიშვნელოვანია პროტოკოლში ახალი სიმპტომებიც დაემატოს.
„დღევანდელი მიზნობრივი ტესტირების პრინციპი უნდა იყოს კარგად შესრულებული. ისევ ფილტრის დაყენებას ცდილობენ ექიმები,რომ ეს სიმპტომი შეიძლება იყოს დაკავშირებული კოვიდთან, ეს სიმპტომი შეიძლება არ იყოს, ეს გასაგებია ნაწილობრივ დაკავშირებული იყო ტესტების დეფიციტთან. ვთვლი რომ დიარეის მქონე პაციენტებიც უნდა იყვნენ გამოსაკვლევთა სიაში. თუ ჩვენ ესე მივუდგებით, როგორია პროცენტი გამოვლენილთა, შეიძლება რომ დიარეის მქონე პაციენტებთან ნაკლები ვიპოვოთ და თითქოს რესურსის კარგვა იქნება, მაგრამ ასე აღარ უნდა მივუდგეთ, რადგან თუნდაც გამოვიკვლიოთ 50-100 ადამიანი და ერთი ვიპოვოთ ამ პირობებში, ესეც მნიშვნელოვანია, რადგან ჩვენ ათასობით ადამიანი კარანტინში გადაგვყავს, იმიტომ რომ ერთეულები არ გაგვეპაროს“,-აცხადებს მაია ბუწაშვილი.
ჯანდაცვის სფეროს წარმომადგენლები აცხადებენ, რომ ჯანდაცვას ტესტების საკმარისი რაოდენობა მობილიზებული არ აქვს და მათი მომარაგება დაგვიანებით მოხდა, რაც საბოლოო ჯამში გახდა იმის მიზეზი, რომ დღესდღეობით ტესტები არასაკმარის რაოდენობას უტარდება.
დახურვა