ვარკეთილში სპეცრაზმია მობილიზებული-საცხოვრებელი კორპუსიდან სროლის ხმა ისმოდა (განახლებადი)

16:35 ვარკეთილში სპეცოპერაცია დასრულდა, შეიარაღებული პირი პოლიციას ჩაბარდა

15:05 როგორც ცნობილი ხდება, პირი, რომელმაც ცეცხლი გახსნა დავით ივანოვია.

14:50-შუამთის ქუჩაზე საცხოვრებელ ბინაში ცაკეტილი მამაკაცი დავით ივანოვია, რომელსაც პირობითი მსჯავრი უახლოეს მომავალში უმთავრდებოდა და მას შემაკავებელი ორდერი ჰქონდა გამოწერილი.

14:37 - ბინაში ჩაკეტილი მამაკაცი, რომელთანაც მოლაპარაკებები ამ დრომდე უშედეგოდ მიმდინარეობს, სავარაუდოდ სანადირო თოფიდან ისვროდა.

14:02-მამაკაცთან, რომელიც ბინაშია ჩაკეტილი, სამართალდამცველებმა მოლაპარაკებები დაიწყეს. პროცესი მიდის როგორც სატელეკომუნიკაციო, ასევე პირადი კონტაქტით. თვითმხილველების თქმით, მამაკაცმა ოჯახის წევრების შეშინების მიზნით გაისროლა.

13:56 შემთხვევის ადგილზე მივიდა შინაგან საქმეთა სამინისტროს საპატრულო პოლიციის დეპარტამენტის უფროსი, ვაჟა სირაძე.

13:30 ტერიტორიაზე შსს-ს მსუბუქი ჯავშანტრანსპორტი მივიდა. ადგილზე კვლავ ისმის სროლის ხმა. პოლიციამ პერიმეტრი გადაკეტა.

13:19 - ვარკეთილში შუამთის ქუჩაზე სპეცრაზმი და პოლიციაა მობილიზებული. როგორც შსს-ში "ფორმულას" განუცხადეს, ერთ-ერთ საცხოვრებელ სახლში ახალგაზრდა კაცია ჩაკეტილი. კაცს თან აქვს იარაღი, საიდანაც მან რამდენჯერმე გაისროლა.

ერთ-ერთი ვერსიით, მამაკაცი სახლში მას შემდეგ ჩაიკეტა, რაც კონფლიქტი მოუვიდა ოჯახის წევრებთან. მისი მეუღლე და შვილები ბინაში არ იმყოფებიან.

საცხოვრებელი კორპუსი, სადაც მამაკაცი იმყოფება, პოლიციის შენობიდან რამდენიმე მეტრში მდებარეობს.