საქართველოს საკონსტიტუციო სასამართლოს ახალი თავმჯდომარის ვინაობა ხვალ გახდება ცნობილი. საკითხს არასამთავრობო სექტორში ეხმაურებიან სასამართლო სისტემაში არსებულ გარიგებებზე საუბრობენ.
„ბატონი მერაბ ტურავას კანდიდატად ნომინირება და იმ ადამიანების მხარდაჭერა, რომლებიც არც თუ ისე შორეულ წარსულში ერთმანეთის ოპონენტები იყვნენ, აჩენს გარკვეულ ეჭვებს, რომ შესაძლებელია, სახეზე გვქონდეს ერთგვარი არაჯანსაღი გარიგება. თუმცა ეს ეჭვები დარჩება ეჭვებად და დანარჩენს უახლოეს მომავალი გვაჩვენებს“, - განაცხადა "საქართველოს დემოკრატიული ინიციატივის" ხელმძღვანელმა გიორგი მშვენიერაძემ.
მანანა კობახიძის მხრიდან ტურავას მხარდაჭერა კითხვის ნიშნებს აჩენს ასევე საია-ს თავმჯდომარის, სულხან სალაძისთვის.
„ქალბატონი კობახიძის მონაწილეობა ამ პროცესში, ვინც წლების წინ „ქართული ოცნების“ ხელისუფლებაში მოსვლის დროს ერთ-ერთი ძირითადი საუბრის თემა მათთვის და ქალბატონი მანანასთვის იყო სწორედ იმ სასამართლო სისტემის დაშლა და გაწმენდა პრობლემებისგან, რაც წინა ხელისუფლების დროს იყო, დღეს რატომღაც აღმოჩნდა, რომ იმ ადამიანებთან ერთად არის ხელმომწერი, ვინც ქმნიდა სისტემას სასამართლოში და ვინც დანიშნა შემდგომში ორი ახალი მოსამართლე“, - განაცხადა სულხან სალაძემ.
შეგახსენებთ, „ფორმულას" ექსკლუზიური ინფორმაციით, მანანა კობახიძის მხარდაჭერა ე.წ. კლანმა მისი ძმის, თედო კობახიძის უზენაეს სასამართლოში დანიშვნის სანაცვლოდ მიიღო. სამოქალაქო სექტორში სწორედ ამ ინტერესების თანხვედრით ხსნიან იმ ფაქტს, რომ მანანა კობახიძე მურუსიძე-ჩინჩალაძის მიმართ კრიტიკული პოზიციებით აღარ გამოირჩევა.
დახურვა