საქართველოს იუსტიციის უმაღლესი საბჭოს წევრის თანამდებობიდან ანა დოლიძე გათავისუფლდა. თანამდებობის დატოვების შესახებ პრეზიდენტს ანა დოლიძემ პირადი განცხადებით მიმართა.
იუსტიციის უმაღლესი საბჭოს არამოსამართლე წევრის ნაზი ჯანეზაშვილის განცხადებით, იუსტიციის უმაღლეს საბჭოს სჭირდება ადამიანი, რომელიც იქნება პრინციპული და ექნება შესაბამისი კვალიფიკაცია.
„პოლიტიკურ კონტექსტს თუ გავითვალისწინებთ რა თქმა უნდა ეს რისკები არსებობს, თუმცა დაველოდოთ მოვლენების განვითარებას, როგორ წარიმართება კონკურსი, რამდენად იქნება ჩართულობა შესაძლებელი და რამდენად ობიექტური გადაწყვეტილება იქნება მიღებული. იუსტიციის უმაღლეს საბჭოს ახლაც და მერეც სჭირდება ადამიანი, რომელიც იქნება პრინციპული და ექნება შესაბამისი კვალიფიკაცია. ადამიანი, რომელიც ისარგებლებს იუსტიციის უმაღლესი საბჭოს წევრობით და კლანთან შევა ალიანსში ეს არც სასამართლოს მოუტანს კარგს და არც ჩვენს ქვეყანას“, - განაცხადა ნაზი ჯანეზაშვილმა.
ყოფილი სახალხო დამცველის უჩა ნანუაშვილის განცხადებით, უზენაეს და საკონსტიტუციო სასამართლოში კლანის გაძლიერების ტემპები გაძლიერებულია და არსებობს რისკები, რომ კლანის მმართველობა იუსტიციის უმაღლეს საბჭოშიც გაძლიერდეს.
„კლანი კიდევ უფრო მეტად ფართოვდება და ფაქტიურად სასამართლოს ყველა შტოს აკონტროლებს. კიდევ უფრო გაძლიერდა ბოლო პერიოდის განმავლობაში. ჩვენ ვნახეთ რომ უზენაეს და საკონსტიტუციო სასამართლოში კლანის გაძლიერების ტემპები გაძლიერებულია. რისკები ნამდვილად არსებობს, რომ საბჭოშიც გაძლიერდება კლანის ინტერესების გათვალისწინება“, - განაცხადა უჩა ნანუაშვილმა.
„საიას“ თავმჯდომარის სულხან სალაძის განცხადებით, მიმდინარე პროცესების დროს პრეზიდენტი სალომე ზურაბიშვილი იმ პროცესებს აგრძელებს, რომელიც ხელისუფლებისთვის არის კომფორტული.
„ქალბატონი სალომე როგორც პრეზიდენტი არ განიხილება, როგოც დამოუკიდებელი არბიტრი და მოთამაშე ამ პროცესში. უფრო იმის განცდა გვაქვს, რომ ის იმ პროცესებს აგრძელებს რა ხელისუფლებისთვის არის მისაღები, და რაც ხელისუფლებისთვის შეიძლება იყოს კომფორტული. სასამართლო სისტემა დიდი ხანია გასულია დამოუკიდებლობის ნაწილისგან. დღეს და ამ დღებში ჩვენ ვხედავთ მორიგ გაფორმებას სასამართლო ხელისუფლების“, - განაცხდა სულხან სალაძემ.
დახურვა