არასამთავრობო ორგანიზაციები მთავრობას მოუწოდებენ ოკუპირებული ცხინვალის რეგიონის მიმდებარე სოფლებში ადამიანის უფლებების საწინააღმდეგო გადაადგილების რეჟიმი შეცვალოს. კერძოდ, საუბარია უსაფრთხოების სამსახურების მიერ მედიის, სამოქალაქო საზოგადოებისა და პოლიტიკური პარტიების წარმომადგენლების დაშვების ზოგად და ბლანკეტურ შეზღუდვაზე.
როგორც არასამთავრობო ორგანიზაციების განცხადებაშია ნათქვამი, 2019 წლის 30 აგვისტოს შემდეგ მხოლოდ ორი შემთხვევა იყო, როცა ჟურნალისტები, პოლიციის თანხლებით შეუშვეს მავთულხლართებამდე მოვლენების გასაშუქებლად.
„სამოქალაქო საზოგადოების და მედიისთვის გადაადგილების შეზღუდვების დაწესება დროში ემთხვევა ჩორჩანაში საგუშაგოს გახსნასთან დაკავშირებულ პოლიტიკურ დაძაბულობას, თუმცა გადაადგილების შეზღუდვის არეალი ბევრად უფრო ვრცელია, ვიდრე ჩორჩანაში ქართული საგუშაგო.
სხვა შემთხვევებში მედიის, სამოქალაქო აქტივისტების და პოლიტიკური პარტიების არაერთი მცდელობის მიუხედავად, უსაფრთხოების სამსახურები მათ იმ სოფლებშიც არ უშვებენ, რომელიც საოკუპაციო ხაზთან ახლოსაც არ არის. შეზღუდვების დამკვიდრებული პრაქტიკა ხელს უშლის მათ საჯარო საქმიანობის განხორციელებაში და ზღუდავს ინფორმაციის მოპოვებისა და გავრცელების პროცესს.
ეს შეზღუდვები ასევე აფერხებს გამყოფ ხაზებთან მიმდებარე სოფლებში არსებული სოციალური და უფლებრივი მდგომარეობის შესწავლას და საჯაროობაში მათ დაყენებას. აღსანიშნავია, რომ ჟურნალისტებს საქართველოს კონტროლირებად ტერიტორიაზე არსებულ სოფლებთან მიახლოებაზე უარი პოლიციის თანხლებითაც ეთქვათ“, - აცხადებენ არასამთავრობო ორგანიზაციის წარმომადგენლები.
არასამთავრობო ორგანიზაციები მიიჩნევენ, რომ ხელისუფლების მიერ უსაფრთოებასთან დაკავშირებული წუხილი გაუგებარია.
„ხელისუფლების წარმომადგენლები გადაადგილების შეზღუდვებს უსაფრთხოების მიზეზებიდან გამომდინარე ამართლებენ, რათა თავიდან იყოს აცილებული საოკუპაციო ხაზთან პროვოკაციები და დაცული იყოს მედიის და სამოქალაქო აქტივისტების უსაფრთხოება. თუმცა უსაფრთხოებასთან დაკავშირებულ წუხილებზე მითითება, მაშინ როდესაც ამ სოფლებში ასობით ადამიანი ცხოვრობს გაუგებარია“, - ნათქვამია განცხადებაში.
სამოქალაქო სექტორის წარმომადგენლები ამბობენ, რომ ბუნდოვანია როგორც დაწესებული შეზღუდვის კანონიერების, ისე პროპორციულობის საკითხი.
„ზემოთ აღნიშნულის გათვალისწინებით, მოვუწოდებთ საქართველოს მთავრობას:
- გააუქმოს საოკუპაციო ხაზთან და მის მიმდებარე სოფლებში მედიის, სამოქალაქო საზოგადოებისა და პოლიტიკოსების დაშვების ბლანკეტური აკრძალვა;
- შეიმუშავოს ობიექტურ კრიტერიუმებზე დაფუძნებული მიდგომები, რომელიც არ გასცდება გადაადგილებისა და გამოხატვის თავისუფლების შეზღუდვის ლეგიტიმურ ჩარჩოებს.
ხელმომწერი ორგანიზაციები:
- ადამიანის უფლებების სწავლებისა და მონიტორინგის ცენტრი (EMC)
- საქართველოს ახალგაზრდა იურისტთა ასოციაცია (საია)
- ადამიანის უფლებათა ცენტრი (HRC)
- დემოკრატიის კვლევის ინსტიტუტი (DRI)“, - აღნიშნულია მიმართვაში.
დახურვა