თბილისი პრაიდში აცხადებენ, რომ ბოლო რამდენიმე თვეა, მათი ოფისი რელიგიური და ულტრამემარჯვენე ჯგუფების ინტენსიური თავდასხმების სამიზნეა. მათი ინფორმაციით, თავდასხმები 17 მაისის შემდეგ დაიწყო, როცა ონლაინ აქცია ჩაატარეს და სხვა მხარდამჭერების მსგავსად, ოფისიდან ლგბტ დროშა გადმოფინეს.
თბილისი პრაიდი გავრცელებულ განცხადებაში მათ ოფისზე თავდასხმების ქრონოლოგიას აღწერს:
- 23 მაისიდან ულტრამემარჯვენე ჯგუფების წევრებმა პრაიდის ოფისთან შეკრება დაიწყეს, ისინი დროშის ჩამოხსნას ცდილობდნენ. 25 მაისს მათ დროშა მოიპარეს, რის შემდეგაც ახალი დროშა დავკიდეთ;
- ივნისიდან, როცა პანდემიასთან დაკავშირებული შეზღუდვები მოიხსნა და ოფისში მუშაობა განვაახლეთ, ულტრამემარჯვენე ჯგუფებმა ოფისის წინ რეგულარული შეკრებები დაიწყეს. მათ ხელში ჰომოფობიური სიძულვილის ენის შემცველი ბანერები ეჭირათ, ასევე, ხშირად ყვიროდნენ და პრაიდის აქტივისტებს სიტყვიერ შეურაცხყოფას გვაყენებდნენ;
- 7 ივნისს რადიკალური ჯგუფების წარმომადგენლებმა აივნიდან გადმოკიდულ ცისარტყელას დროშას და შენობას შავი საღებავები შეასხეს;
- ივნისის განმავლობაში ოფისის წინ შეკრებები და შეურაცხმყოფელი დემონსტრაცია რეგულარულად, ყოველდღიურ რეჟიმში გრძელდებოდა. შეკრებებს ათამდე ადამიანი ესწრებოდა.;
- 2 ივლისს ულტრამემარჯვენე და რელიგიური ჯგუფების მიერ ორგანიზებული შედარებით დიდი აქცია გაიმართა. აქციას 50-მდე ადამიანი ესწრებოდა, მათ შორის, სასულიერო პირები, რომლებმაც ლოცვები წაიკითხეს და ოფისთან, ქუჩაში ნაკურთხი წყალი ასხურეს. აქციის მონაწილეები პრაიდის აქტივისტებს გადაწვით დაემუქრნენ: “ბენზინს გადავასხამთ და ყველას ერთად ამოვბუგავთ”;
- 21 ივლისს ამოუცნობმა პირებმა ოფისის ქუჩის შესასვლელს კვერცხები ესროლეს. 21 ივლისიდან დღემდე (26 აგვისტო) კვერცხების სროლა თითქმის ყოველდღე მეორდება.
მათი თქმით, ამ მოვლენებთან დაკავშირებით, რომლებიც დანაშაულად კვალიფიცირდება (დროშის მოპარვა, დროშის და შენობის დაზიანება, კვერცხების სროლა) არაერთხელ მიმართეს პოლიციას, თუმცა მიმდინარე გამოძიებები ჯერჯერობით უშედეგო აღმოჩნდა.
"აშკარაა, რომ აღნიშნული მოვლენები წარმოადგენს ჰომოფობიისა და ტრანსფობიის გამოვლინებას. გარდა სიძულვილის გამოხატვისა და სიძულვილით მოტივირებული დანაშაულისა, მიგვაჩნია, რომ ეს მოვლენები, და განსაკუთრებით, დროშასთან დაკავშირებული ინციდენტები, არის თავდასხმა ჩვენს გამოხატვის თავისუფლებასა და უფლებადაცვით საქმიანობაზე.
ჩვენთვის, როგორც ქვიარ მოქალაქეებისთვის, ცისარტყელის დროშის გამოყენება თვითგამოხატვის ერთერთი მნიშვნელოვანი ფორმაა. გარდა ამისა, ისეთი მოვლენები, როგორიცაა ჰომოფობიური ბანერები, შეურაცხმყოფელი გამონათქვამები, რელიგიური აქციის ჩატარება და კვერცხების სროლა წარმოადგენს ჩვენი, პრაიდის აქტივისტების მიმართ ფსიქოლოგიურ ძალადობას.
ამ აგრესიული, ძალადობრივი აქტით, კანონდამრღვევები არა მხოლოდ სტრესის ქვეშ გვამყოფებენ ორგანიზაციის თანამშრომლებს, ხელს გვიშლიან მუშაობაში, არამედ აღრმავებენ ჩვენ მიმართ და ზოგადად ლგბტქ თემის მიმართ არსებულ ზიზღს, სტიგმას, ახალისებენ სხვებს ძალადობრივი, კანონსაწინააღმდეგო აქტების ჩადენისკენ. თვეების განმავლობაში მიმდინარე მიზანმიმართული ძალადობა და შეურაცხყოფა აქტივისტებს სტრესულ გარემოში გვამყოფებს და პრაქტიკულად, შეუძლებელს ხდის მშვიდი, უსაფრთხო სამუშაო სივრცისა და გარემოს შენარჩუნებას", - აღნიშნავენ თბილისი პრაიდში.
მათი თქმით, მიაჩნიათ, რომ თბილისი პრაიდი და მისი აქტივისტები არიან დაზარალებული პირები, რომელთა მიმართ ხორციელდება საქართველოს სისხლის სამართლის კოდექსით გათვალისწინებული ისეთი დანაშაულები, როგორიც არის: თანასწორუფლებიანობის დარღვევა, ძალადობა, საზოგადოებრივი ორგანიზაციის საქმიანობისათვის ხელშეშლა, დევნა.
ორგანიზაცია მიმართავს შსს-ს, დროულად გამოიძიოს აღნიშნული ინციდენტები და პასუხისმგებელ პირებს შესაბამისი სანქციები დააკისროს, ასევე მიმართავს საქართველოს სახალხო დამცველსა და პარტნიორ ორგანიზაციებს, თვალი მიადევნონ აღნიშნულ მოვლენებს და გამოეხმაურონ.
დახურვა