პრემიერმინისტრ ირაკლი ღარიბაშვილის თქმით, დაწყებულია ეკონომიკის ძალიან სწრაფი აღდგენა. მთავრობის სხდომის დაწყებამდე მან "უპრეცედენტო და ძალიან პოზიტიური" უწოდა 2021 წლის აპრილში, წინა წლის შესაბამის პერიოდთან შედარებით, საქართველოს ეკონომიკის 44.8%-ით ზრდას.
აღსანიშნავია, რომ გასული წლის აპრილში, რასაც ამ წლის მონაცემი დარდება, ეკონომიკა 16%-ზე მეტით შემცირდა.
როგორც ღარიბაშვილი ამბობს, ძალიან სასიხარულოა ისიც, რომ 2021 წლის პირველი ოთხი თვის ეკონომიკური ზრდის საშუალო მაჩვენებელმა 8.1% შეადგინა.
"ეს არის მთავრობის სწორი პოლიტიკის და ჩვენს მიერ გადადგმული ნაბიჯების შედეგი, ბიზნესში არის ძალიან პოზიტიური განწყობები, ძალიან პოზიტიური მოლოდინები, ამას აქვს ძალიან დიდი მნიშვნელობა", - თქვა ღარიბაშვილმა.
საქსტატის წინასწარი შეფასებით, 2021 წლის აპრილში წინა წლის შესაბამის პერიოდთან შედარებით, საქართველოს ეკონომიკა 44.8%-ით გაიზარდა, პირველი ოთხი თვის ეკონომიკური ზრდის საშუალო მაჩვენებელმა კი 8.1% შეადგინა.
აპრილში, წინა წლის შესაბამის პერიოდთან შედარებით ზრდა შეინიშნებოდა შემდეგ დარგებში: დამამუშავებელი მრეწველობა, მშენებლობა, ვაჭრობა, ტრანსპორტი და დასაწყობება, სასტუმროები და რესტორნები, საფინანსო და სადაზღვევო საქმიანობა, უძრავ ქონებასთან დაკავშირებული საქმიანობა, პროფესიული, სამეცნიერო და ტექნიკური საქმიანობა. კლების ტენდენცია დაფიქსირდა სამთომოპოვებითი მრეწველობის დარგში.
დახურვა