logo
ENG



ბონძღი, ტყვლიპე, პუპუშა და კიდევ 10 პირი "ქურდულ სამყაროსთან" კავშირისთვის დააკავეს

10 ივნ 202114:03
3 წუთის საკითხავი
clock 15884

შინაგან საქმეთა სამინისტროს ინფორმაციით, "ქურდული სამყაროს" წევრობის, "ქურდული სამყაროს" წევრისთვის მიმართვის და "ქურდული სამყაროს" საქმიანობის მხარდაჭერის ბრალდებით თბილისში, თელავსა და ქუთაისში 13 პირი დააკავეს.

დაკავებულები არიან: 1978 წელს დაბადებული ვ. გ. (მეტსახელად ვიტო), 1976 წელს დაბადებული ჯ. ხ. (მეტსახელად ჯეკო), 1983 წელს დაბადებული რ. გ. (მეტსაცლეად პუპუშა, 1974 წელს დაბადებული გ. რ. (მეტსახელად ხონსკი), 1987 წელს დაბადებული რ. დ. (მეტსახელად ბაჩო), 1992 წელს დაბადებული ა. შ., 1995 წელს დაბადებული ა. ლ., 1973 წელს დაბადებული გ. მ. (მეტსახელად გიბონა), 1978 წელს დაბადებული გ. დ., 1975 წელს დაბადებული ი. ჭ., 1966 წელს დაბადებული მ. კ. (მეტსახელად ტყვლიპე), 1978 წელს დაბადებული გ. მ. (მეტსახელად ბონძღი), 1996 წელს დაბადებული მ. მ. ( მეტსახელად მემი). დანაშაულები 7-დან 10 წლამდე ვადით თავისუფლების აღკვეთას ითვალისწინებს.

მათი ცნობით, ბრალი დაუსწრებლად წარედგინა კიდევ ერთ პირს, საზღვარგარეთ მყოფ კანონიერ ქურდს ზ. მ.-ს (მეტსახელად გლეხოვიჩს), რაც 9-დან 15 წლამდე ვადით თავისუფლების აღკვეთას ითვალისწინებს.

მათივე ინფორმაციით, გამოძიებით დადგინდა, რომ ერთ-ერთ ბრალდებულს, ბიზნესსაქმიანობის პროცესში შემოსავლების არაობიექტურად განაწილებასთან დაკავშირებით, ფინანსური დავა წარმოექმნა ბიზნესპარტნიორთან.

"მოდავე მხარეებმა უთანხმოების გამო არსებული დავის მოსაგვარებლად "ქურდული სამყაროს" წევრებს მიმართეს, რის შემდეგაც ერთ-ერთმა საზღვარგარეთ მყოფმა კანონიერმა ქურდმა - ზ.მ.-მ საქმის გარჩევის ორგანიზება თავის შვილს - მ.მ.-ს დაავალა.

ამ უკანასკნელმა კი 2021 წლის 16 აპრილს, თბილისში, ერთ-ერთ საცხოვრებელ სახლში, დავის ქურდული წესით გარჩევის ორგანიზება მოახდინა, რომლის შედეგად, ერთ-ერთ მოდავე მხარეს მეორის სასარგებლოდ 80 000 ლარის გადახდა დაეკისრა.

სამართალდამცველებმა, მოსამართლის განჩინების საფუძველზე ჩატარებული ჩხრეკის შედეგად, ნივთმტკიცებად ამოიღეს კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მცხოვრებ ქართველ "კანონიერ ქურდს" უკავშირდებოდნენ.

ასევე, მოსამართლის განჩნების საფუძველზე, პოლიციამ 4 ავტომანქანა და საბრძოლო ვაზნები ნივთმტკიცებად ამოიღო", - ნათქვამია განცხადებაში.

გამოძიება "კანონიერი ქურდობის", "ქურდული სამყაროს" წევრობის, "ქურდული სამყაროს" წევრისთვის მიმართვის და "ქურდული სამყაროს" საქმიანობის მხარდაჭერის ფაქტზე, საქართველოს სისხლის სამართლის კოდექსის 223-ე პრიმა მუხლის 1-ლი და მე-2 ნაწილებით, 223-ე პრიმა-3 და 223-ე პრიმა-4 მუხლებით მიმდინარეობს.


close დახურვა