პროკურატურასთან, შუშანა მაცაბერიძე დააკავეს, ის ჩოლოიანის გათავისუფლებას აპროტესტებდა

პროკურატურასთან მიმდინარე აქციაზე, სადაც აქტივისტები ლუკა სირაძის საქმეში მსჯავრდებული მარიანა ჩოლოიანის გათავისუფლებას აპროტესტებდნენ, ერთი ადამიანი დააკავეს. 

მოძრაობა დროას აქტივისტებს სურდათ, რომ უწყების მიმდებარე ტერიტორიაზე წარწერა: "ამ ცხოვრების დედაც..." დაეწერათ, თუმცა პოლიციამ ამის შესაძლებლობა არ მისცა. 

მოძრაობა დროას ლიდერის ელენე ხოშტარიას ინფორმაციით, დაკავებულია აქტივისტი შუშანა მაცაბერიძეა. 

"ჩოლოიანის გამოშვების გაპროტესტების გამო შუშანა მაცაბერიძე დააკავეს. შუშანა იამაყებს ამით და თქვენ რა გეშველებათ სისხლში ამოთხვრილებო", - წერს ელენე ხოშტარია Facebook-ზე.

მანამდე ასეთი წარწერა აქტივისტებმა იუსტიციის სამინისტროსთან დატოვეს. 

დღეს, 5 აგვისტოს ცნობილი გახდა, რომ ე.წ. უდოს კომისიის გადაწყვეტილებით, მარიანა ჩოლოიანმა საპატიმრო ვადაზე ადრე დატოვა. გასული წლის სექტემბერში მოზარდის მიმართ ჩვენების იძულების ბრალდებით ჩოლოიანს სასამართლომ 3 წლით თავისუფლების აღკვეთა მიუსაჯა. 

15 წლის ლუკა სირაძე ერთ-ერთი კორპუსის მე-9 სართულიდან 2019 წლის 11 დეკემბერს გადახტა. ის რამდენიმე დღე კომაში იყო, 17 დეკემბერს კი გარდაიცვალა. ოჯახის და საქართველოს ახალგაზრდა იურისტთა ასოციაციის ცნობით, ლუკა სირაძეზე პოლიციამ ფსიქოლოგიურად იძალადა - მას 2 დღის განმავლობაში კითხავდნენ და მუქარით სთხოვდნენ დანაშაულის აღიარებას მას შემდეგ, რაც "მწვანე სკოლის" კედლებზე წარწერები გააკეთა.

გამოკითხვას მოზარდის დედაც ესწრებოდა, თუმცა, როგორც საიამ და თავად ლუკა სირაძის დედამ თქვა, მოზარდი დაახლოებით 20 წუთით გამომძიებლებთან ოთახში მარტო დარჩა. საქმეში სახელმწიფო ინსპექტორის სამსახური ჩაერთო.

17 დეკემბერს გამომძიებელი მარიანა ჩოლოიანი დააკავეს. 2020 წლის 15 ივლისს, ფორმულას ეთერში ლუკა სირაძის დედამ, ელიკო ჩხიტუნიძემ თქვა, რომ დაკითხვის დროს გამომძიებელი მარიანა ჩოლოიანი ბავშვს "კისრის მოგრეხით" ემუქრებოდა. ასევე, მისი თქმით, განყოფილებაში მყოფი სხვა პირებისგან გინება ისმოდა. ელიკო ჩხიტუნიძის და საიას მტკიცებით, მოზარდზე ზეწოლას, ჩოლოიანის გარდა, კიდევ 3 პოლიციელი ახდენდა. 7 თებერვალს, სახელმწიფო ინსპექტორის სამსახურმა გენერალურ ინსპექციას მიმართა საქმეში სხვა პოლიციელების გადაცდომებზე რეაგირების მოთხოვნით. მარიანა ჩოლოიანის მიმართ არასათანადო მოპყრობის ბრალდება 2011 წელსაც არსებობდა. მაშინ ადამიანის უფლებათა ევროპულმა სასამართლომ დაადგინა. კერძოდ, საქმე 2011 წლის 26 მაისს ე.წ ყინწვისის სპეცოპერაციის დროს ნიკოლოზ გოგუაძის საქმეს ეხება. მარიანა ჩოლოიანმა დასჯისა და აღიარებითი ჩვენების მოპოვებისთვის გოგუაძის მიმართ როგორც ფიზიკურად, ისე ფსიქოლოგიურად იძალადა.