15 წლის მოზარდის ლუკა სირაძის დედა ელიკო ჩხიტუნიძე ამბობს, რომ მისი შვილის გარდაცვალების საქმეში ჩართულ გამომძიებლებს, მათ შორის მარიანა ჩოლოიანს მფარველობენ.
როგორც ჩხიტუნიძემ ფორმულას განუცხადა, ჩოლოიანის გარდა სხვა პოლიციელებიც უნდა დაეკავათ, თუმცა საქმეზე მხოლოდ ყოფილი გამომძიებელი დააკავეს. მისი თქმით, ოჯახს აქვს იმის განცდა, რომ სამართალს ვერ იპოვიან.
"ესეთი უპატრონოები ვიყავით. თვითონ გვიტოვებენ განცდას, რომ სამართალს ვერ ვიპოვით. ჯერ ეკუთვნოდა 9 წელი, მაგრამ არ მისცეს, მერე იყო სასჯელის უმაღლესი ზომა 5 წელი, ეს 5 წელიც არ მისცეს... ნამდვილად მფარველობდნენ, რა თქმა უნდა, თორე მაგასთან, ის პოლიციის უფროსის მოადგილე უჩა მამასახლისი - ისიც ისეთივე დამნაშავე იყო. ისინი ერთად მოქმედებდნენ. რატომ ის არ დაიჭირეს?! ერთი ადგილიდან მეორეზე გადაიყვანეს. მოელაპარაკეს, რომ შენ მალე გამოგიყვანთ. მეტი აზრი არ არის, ამას მიხვდება ყველა", - განაცხადა მოზარდის დედამ.
დღეს, 5 აგვისტოს ცნობილი გახდა, რომ ე.წ. უდოს კომისიის გადაწყვეტილებით, მარიანა ჩოლოიანმა საპატიმრო ვადაზე ადრე დატოვა. გასული წლის სექტემბერში მოზარდის მიმართ ჩვენების იძულების ბრალდებით ჩოლოიანს სასამართლომ 3 წლით თავისუფლების აღკვეთა მიუსაჯა.
15 წლის ლუკა სირაძე ერთ-ერთი კორპუსის მე-9 სართულიდან 2019 წლის 11 დეკემბერს გადახტა. ის რამდენიმე დღე კომაში იყო, 17 დეკემბერს კი გარდაიცვალა. ოჯახის და საქართველოს ახალგაზრდა იურისტთა ასოციაციის ცნობით, ლუკა სირაძეზე პოლიციამ ფსიქოლოგიურად იძალადა - მას 2 დღის განმავლობაში კითხავდნენ და მუქარით სთხოვდნენ დანაშაულის აღიარებას მას შემდეგ, რაც "მწვანე სკოლის" კედლებზე წარწერები გააკეთა.
გამოკითხვას მოზარდის დედაც ესწრებოდა, თუმცა, როგორც საიამ და თავად ლუკა სირაძის დედამ თქვა, მოზარდი დაახლოებით 20 წუთით გამომძიებლებთან ოთახში მარტო დარჩა. საქმეში სახელმწიფო ინსპექტორის სამსახური ჩაერთო.
17 დეკემბერს გამომძიებელი მარიანა ჩოლოიანი დააკავეს. 2020 წლის 15 ივლისს, ფორმულას ეთერში ლუკა სირაძის დედამ, ელიკო ჩხიტუნიძემ თქვა, რომ დაკითხვის დროს გამომძიებელი მარიანა ჩოლოიანი ბავშვს "კისრის მოგრეხით" ემუქრებოდა. ასევე, მისი თქმით, განყოფილებაში მყოფი სხვა პირებისგან გინება ისმოდა. ელიკო ჩხიტუნიძის და საიას მტკიცებით, მოზარდზე ზეწოლას, ჩოლოიანის გარდა, კიდევ 3 პოლიციელი ახდენდა. 7 თებერვალს, სახელმწიფო ინსპექტორის სამსახურმა გენერალურ ინსპექციას მიმართა საქმეში სხვა პოლიციელების გადაცდომებზე რეაგირების მოთხოვნით. მარიანა ჩოლოიანის მიმართ არასათანადო მოპყრობის ბრალდება 2011 წელსაც არსებობდა. მაშინ ადამიანის უფლებათა ევროპულმა სასამართლომ დაადგინა. კერძოდ, საქმე 2011 წლის 26 მაისს ე.წ ყინწვისის სპეცოპერაციის დროს ნიკოლოზ გოგუაძის საქმეს ეხება. მარიანა ჩოლოიანმა დასჯისა და აღიარებითი ჩვენების მოპოვებისთვის გოგუაძის მიმართ როგორც ფიზიკურად, ისე ფსიქოლოგიურად იძალადა.
დახურვა