Facebook-მა მუშაობა განაახლა. ის შეფერხებით, მაგრამ ფუნქციონირებს, ისევე, როგორც ინსტაგრამი და ვოთსაპი.
ეს სამი პლატფორმა დაახლოებით 6 საათის განმავლობაში მთელი მსოფლიოს მასშტაბით იყო გათიშული. ინსტაგრამს და ვოთსაპს ფეისბუქი ფლობს - კომპანიის ისტორიაში ეს ყველაზე ხანგრძლივი გამორთვაა.
ფეისბუქმა გათიშვისთანავე გაავრცელა განცხადება, რომ პრობლემის აღმოფხვრაზე მუშაობენ. მას შემდეგ კომპანიას არ დაუზუსტებია, რა გახდა გამორთვის მიზეზი.
გამოცემა Insider Paper-მა დაწერა, რომ ფეისბუქის თანამშრომლებმა ოფისში შესვლაც ვერ მოახერხეს, ვინაიდან არც მათი საშვები მუშაობდა.
ფეისბუქის აქციების ფასი ბოლო რამდენიმე საათში 5.43%-ით შემცირდა.
ბლუმბერგის ინფორმაციით, კომპანიის მფლობელმა და დამფუძნებელმა, მარკ ცუკერბერგმა 7 მილიარდი აშშ დოლარი დაკარგა.
დახურვა