სოციალური მომსახურების სააგენტოს თანამშრომლების გაფიცვა მოლაპარაკებით დასრულდა. შესაბამისად, ამ ეტაპზე მათ გაფიცვა შეწყვიტეს.
სოლიდარობის ქსელი, რომელიც სოციალური აგენტების უფლებებს იცავდა, აცხადებს, რომ გაფიცვა სრულდება შემდეგი პირობებით:
- "15 წელზე მეტია სააგენტოში ხელფასები არ გაზრდილა და ჩვენ მივიღეთ ხელფასების 40%-60%-ით მატება;
- მივიღეთ ანაზღაურებადი დეკრეტული შვებულება, რაც ნიშნავს, რომ ყოველი ბავშვის გაჩენის შემდეგ ყოველ თვე მშობელი მიიღებს იგივე ხელფასს, როგორც მუშაობისას;
- გაფიცულებს აუნაზღაურდებათ გაფიცული სამუშაო დრო;
- სოც. აგენტები და უფროსი სოც. აგენტები იქნებიან უზრუნველყოფილი ტრანსპორტით;
- გაუქმდება ერთთვიანი ხელშეკრულებები და ყველა დასაქმებულთან დაიდება ერთწლიანი ხელშეკრულებები;
- შეიქმნება სპეციალური საკომუნიკაციო პლატფორმა დასაქმებულსა და დამსაქმებელს შორის;
- უმჯობესდება დანამატის წესი და მოიხსნება 15 დღიანი ლიმიტი;
ეს არის მხოლოდ პირველი წინ გადადგმული ნაბიჯი! სოციალური აგენტები, სპეციალისტები, იურისტები - ადამიანები, რომლებიც ერთმანეთს არც იცნობებდნენ, ერთად იბრძოლეს, ერთად დაიწყეს „სოლიდარობის ქსელის“ პროფკავშირში ერთმანეთისვე გაძლიერება და თავდადებით მიაღწიეს პირველ მოგებას.
ეს მხოლოდ დასაწყისია, ჩვენი პროფკავშირული კოლექტიური ბრძოლა გრძელდება!". - ნათქვამია სოლიდარობის ქსელის განცხადებაში.
400-ზე მეტი სოციალური აგენტი 17 იანვრიდან გაიფიცა. ისინი ხელფასების 100%-ით გაზრდას ითხოვდნენ, ვინაიდან მათი ფიქსირებული ანაზღაურება 200 ლარია.
გაფიცვამდე ერთი დღით ადრე ჯანდაცვის სამინისტრომ განაცხადა, რომ აგენტებს ხელფასს 60%-ით გაუზრდიდნენ, თითო შევსებულ დეკლარაციაზე კი ანაზღაურება 6-დან 10 ლარამდე გაიზრდებოდა.
21 იანვარს გაფიცულ სოციალურ აგენტებს ჯანდაცვის მინისტრის მოადგილე, თამარ ბარკალაიაც შეხვდა.
დახურვა