logo
ENG


შსს-ს თქმით, თბილისი პრაიდის ყველა ღონისძიებას დაიცავენ

27 ივნ 202212:15
3 წუთის საკითხავი
clock 639

შინაგან საქმეთა სამინისტროს განცხადებით, თბილისი პრაიდის კვირეულის ფარგლებში დაგეგმილ ყველა ღონისძიებაზე მონაწილეთა უსაფრთხოებას დაიცავენ. კვირეულის ფარგლებში დაგეგმილია კონფერენცია, ფილმის ჩვენება და ფესტივალი. სამივე ღონისძიება დახურულ სივრცეში გაიმართება.

უწყება მოუწოდებს მოძალადე ჯგუფებს, "არ გასცდნენ კანონით დასაშვებ შეკრებისა და მანიფესტაციის უფლებით სარგებლობის ფარგლებს", წინააღმდეგ შემთხვევაში, "სამართალდარღვევის თითოეული ფაქტი იქნება აღკვეთილი და მკაცრი სამართლებრივი რეაგირება მოჰყვება".

"გვსურს, საზოგადოებას მივაწოდოთ ინფორმაცია თბილისი პრაიდის კვირეულის ფარგლებში დაანონსებულ ღონისძიებებთან დაკავშირებით საქართველოს შინაგან საქმეთა სამინისტროს მიერ დაგეგმილი პრევენციული ღონისძიებების შესახებ.

კვირეულის ფარგლებში დაგეგმილი დახურული ღონისძიებების უსაფრთხო გარემოში ჩატარების მიზნით, საქართველოს შინაგან საქმეთა სამინისტროს წარმომადგენლები მუდმივ კომუნიკაციაში იმყოფებიან აღნიშნული ღონისძიების ორგანიზატორებთან.

საქართველოს შინაგან საქმეთა სამინისტროს წარმომადგენლების ჩართულობით, გაეროს, თბილისი პრაიდის, ადგილობრივი და საერთაშორისო ორგანიზაციების, საქართველოს სახალხო დამცველის აპარატის, ასევე, დიპლომატიური კორპუსის წარმომადგენლების მონაწილეობით, კვირეულის უსაფრთხო გარემოში ჩატარების მიზნით, ბოლო პერიოდში არაერთი სამუშაო შეხვედრა გაიმართა.

საქართველოს შინაგან საქმეთა სამინისტრო მიიღებს ყველა შესაბამის ზომას, რათა უზრუნველყოფილ იქნას „თბილისი პრაიდის" მიერ დაგეგმილი დახურული ღონისძიებების უსაფრთხო ფორმატში ჩატარება, მართლწესრიგის დაცვა, აგრეთვე, კვირეულის ფარგლებში, თითოეული ადამიანის გამოხატვისა და შეკრების თავისუფლებების დაცვა, რომელიც არ გასცდება კანონით დასაშვებ ფარგლებს.

ამასთან, მასობრივი ინფორმაციის საშუალებებით ვრცელდება ინფორმაცია, რომ გარკვეული ჯგუფები გეგმავენ აღნიშნული კვირეულის ფარგლებში დაგეგმილი დახურული ღონისძიებების ჩაშლას.

საქართველოს შინაგან საქმეთა სამინისტრო გმობს ნებისმიერი სახის ძალადობას და მოუწოდებს პრაიდ კვირეულის მოწინააღმდეგე ჯგუფებს დაიცვან კანონი, დაემორჩილონ პოლიციის კანონიერ მოთხოვნებს და არ გასცდნენ კანონით დასაშვებ შეკრებისა და მანიფესტაციის უფლებით სარგებლობის ფარგლებს. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში, სამართალდარღვევის თითოეული ფაქტი იქნება აღკვეთილი და მკაცრი სამართლებრივი რეაგირება მოჰყვება", - ნათქვამია განცხადებაში.

გუშინ, 26 ივნისს თბილისი პრაიდმა საქართველოს ხელისუფლებას მოუწოდა, დაიცვას კვირეულის მონაწილეთა უსაფრთხოება. 

გასული წლის 5 ივლისს პრაიდის დასკვნითი ღონისძიება, ღირსების მარში უნდა გამართულიყო, თუმცა რუსთაველის გამზირი მოძალადე ჯგუფებმა დილიდან დაიკავეს. მათ იძალადეს ჟურნალისტებზე, ოპერატორებს, აქტივისტებსა და გამვლელებზე. სახელმწიფომ მოძალადეები არ შეაკავა და გამოხატვის თავისუფლება არ დაიცვა.


close დახურვა