საქართველოს ჯანდაცვის სამინისტროს მიერ დამტკიცებული ბრძანებით, კორონავირუსის საწინააღმდეგო ვაქცინის მეოთხე დოზის გაკეთება შესაძლებელია გარკვეული კატეგორიის ადამიანებისთვის.
კერძოდ:
- 50 წლის და უფროსი ასაკის ყველა მსურველს, განსაკუთრებული რეკომენდაცია იმუნოკომპრომეტირებული და ქრონიკული დაავადებების მქონე პირებს, ხანგრძლივი მოვლის თავშესაფარში მცხოვრებ პირებს;
- 12-49 წლის ასაკის იმუნოკომპრომეტირებული და ქრონიკული დაავადებების მქონე პირებს. ამასთან, 12-17 წლის ასაკობრივ ჯგუფში მეორე ბუსტერდოზა ტარდება ამცრელი დაწესებულებისთვის ექიმის მიმართვის წარდგენის საფუძველზე, ხოლო 18-49 წლის ასაკობრივ ჯგუფში - დაავადების დამადასტურებელი ნებისმიერი დოკუმენტის წარდგენის შემთხვევაში;
- სამედიცინო დაწესებულებაში დასაქმებულ პერსონალს.
- ვაქცინის მეორე ბუსტერდოზის ჩატარება 18-49 წლის ასაკობრივ ჯგუფში დასაშვებია სწავლის, მკურნალობის ან სხვა მიზნით საზღვარგარეთ გამგზავრების შემთხვევაში, მიმღები ქვეყნის რეგულაციების შესაბამისად.
- მოგზაურობის მიზნებისთვის მეორე ბუსტერდოზის ჩასატარებლად მოქალაქემ ამცრელ დაწესებულებას უნდა წარუდგინოს ბილეთის ჯავშანი.
- ვაქცინის მეორე ბუსტერდოზით ადმინისტრირება უნდა განხორციელდეს პირველი ბუსტერდოზით ვაქცინაციის დასრულებიდან მინიმუმ 4 თვის შემდეგ. მე-2 ბუსტერდოზად შესაძლებელია გამოყენებული იყოს იგივე ან სხვა ვაქცინა.
ბოლო კვირებში საქართველოში კორონავირუსის დადასტურებული შემთხვევების რაოდენობა გაიზარდა.
დაავადებათა კონტროლის ეროვნული ცენტრის მონაცემებით, 27 ივნისიდან 3 ივლისის ჩათვლით კორონავირუსის 2 570 ახალი შემთხვევა გამოვლინდა. გარდაიცვალა 3 ადამიანი. 7 დღიანი ტესტირების დადებითობის მაჩვენებელი 4.05%-ია.
კორონავირუსზე აცრა იცავს სიკვდილისგან. ვაქცინა არ არის 100%-იანი გარანტია იმისა, რომ კორონავირუსით არ დაინფიცირდებით, თუმცა, ადამიანი დაცულია დაავადების გართულებისგან.
ასევე, მასობრივად აცრის შემთხვევაში გაწყდება ვირუსის გადადების ჯაჭვი.
აცრა უსაფრთხოა ორსულებისა და მეძუძური დედებისთვის.
დახურვა