ქართული ოცნების თავმჯდომარის ირაკლი კობახიძის თქმით, თუ ევროკავშირი საქართველოს კანდიდატის სტატუსს მიანიჭებს, არჩევნები 2%-იანი ბარიერით ჩატარდება.
მისი თქმით, ამ პოლიტიკურ ვალდებულებას ევროპული საბჭოსა და ევროპული კომისიის წინაშე იღებენ.
"მივიღეთ შემდეგი გადაწყვეტილება - დეკემბერში, ევროკავშირის მიერ საქართველოსთვის კანდიდატის სტატუსის მინიჭებიდან არაუგვიანეს 1 თვისა, საქართველოს პარლამენტი სამივე მოსმენით მიიღებს კონსტიტუციურ კანონს, რომლის თანახმად, 2024 წლის და მისი მომდევნო საპარლამენტო არჩევნები სრულად პროპორციული სისტემით და 2%-იანი ბარიერით ჩატარდება.
ამ პოლიტიკურ ვალდებულებას ჩვენ ვიღებთ პარტიის პოლიტიკური საბჭოს და საპარლამენტო უმრავლესობის სახელით ევროპული საბჭოსა და ევროპული კომისიის წინაშე", - თქვა კობახიძემ ბრიფინზე.
მისივე თქმით, დღევანდელი მდგომარეობით, არჩევნები 5%-იანი ბარიერით ჩატარდება.
"დარწმუნებული ვართ, ნაციონალურ მოძრაობას თავისი სატელიტებით 2024 წელს 2%-იანი ბარიერის პირობებშიც პირწმინდად დავამარცხებთ, რაც ჩვენი ქვეყნის მშვიდობიანი, დემოკრატიული და სტაბილური განვითარების აუცილებელი პირობაა", - დაამატა კობახიძემ.
არჩევნები სრულად პროპორციული წესით და ბუნებრივი ბარიერი 0%-დან 2%-მდე შარლ მიშელის დოკუმენტში იყო გაწერილი. თუმცა, შეთანხმება ქართულმა ოცნებამ დატოვა. საარჩევნო ცვლილებების კანონპროექტი პირველი მოსმენითაა მიღებული, შემდეგ კანონპროექტის განხილვა შეწყდა.
დახურვა