ბრიტანელი ექსპერტის, ფსიქიატრის, კორნელიუს კატონას თქმით, მიხეილ სააკაშვილის გასინჯვის შედეგად აღმოაჩინა, რომ პატიმრობაში მყოფ მესამე პრეიზდენტს აქვს "პოსტტრავმული სტრესული აშლილობა, კოგნიტური დისონანსი, რისი შედეგიც არის დემენცია".
ამის შესახებ მან თბილისის საქალაქო სასამართლოში გამართულ სხდომაზე განაცხადა, სადაც მიხეილ სააკაშვილის სასაჯელის გადავადებასა ან გათავისუფლებასთან დაკავშირებით სასამართლო პროცესი მიმდინარეობს.
"პაციენტის გასინჯვის შედეგად აღმოვაჩინე პოსტტრავმული სტრესული აშლილობა, კოგნიტური დარღვევები, რისი შედეგიც იყო დემენცია. მე გავატარე დაახლოებით 3 საათი სააკაშვილთან, შევკრიბე სრული ფსიქიატრიული ისტორია, ჩავატარე ფსიქიატრიული მდგომარეობის კვლევა, ასევე ჩავატარე დეტალური კოგნიტური შეფასება. კვლევების შედეგად აღმოვაჩინე მძიმე დარღვევები ყურადღების, მეხსიერების, მეტყველებისა და ვიზუალურ-სივრცობრივი აღქმის მხრივ", - თქვა ფსიქიატრმა.
გარდა ამისა, მან სასამართლო სხდომაზე რეკომენდაციის სახით განაცხადა, რომ მიხეილ სააკაშვილი საჭიროებს მკურნალობას "სხვა კლინიკაში, ქვეყანაში, სადაც თავს უსაფრთხოდ იგრძნობს".
* * *
სააკაშვილის ოჯახის წევრები და ადვოკატები მის უცხოეთში სამკურნალოდ გადაყვანას ითხოვენ - 12 დეკემბერს სტრასბურგში გამართულ პრესკონფერენციაზე კი, ევროპარლამენტარებმა მირიამ ლექსმანმა და ანა ფოტიგამ კიდევ ერთხელ მოუწოდეს ქართულ ოცნებას, გათავისუფლდეს სააკაშვილი ჯანმრთელობის მდგომარეობის გამო.
ამერიკაში ჩატარებულ ტოქსიკოლოგიურ ექსპერტიზაში, რომელსაც პროფესორი დეივიდ სმიტი აწერს ხელს, წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
გარდა ამისა, 24 დეკემბერს შაბათის ფორმულამ მოიპოვა სააკაშვილის ტოქსიკოლოგიური ექსპერტიზის დასკვნა, რომლის ერთ-ერთ პირველ გვერდზე მითითებულია იმ მედიკამენტების ჩამონათვალი, რომლითაც მიხეილ სააკაშვილს სხვადასხვა სამედიცინო დაწესებულებაში მკურნალობდნენ. მათ შორის არის ისეთი მედიკამენტებიც, რომლებსაც დეივიდ სმიტი საშიშ მედიკამენტებს უწოდებს და მიუთითებს, რომ პრეპარატები ამერიკის შეერთებული შტატების საკვებისა და წამლების ადმინისტრაციის (FDA) ან მსოფლიო ჯანდაცვის ორგანიზაციის (WHO) მიერ დამტკიცებული არ არის. სააკაშვილისთვის დანიშნული 14 მედიკამენტიდან, ასეთი ჩამონათვალში 2 წამალია. საერთაშორისო სტანდარტით აკრძალულ მედიკამენტებზე ექსპერტი დასკვნაში წერს, რომ პრეპარატები შესაძლებელია "ბოროტად" იყოს გამოყენებული, რამაც შესაძლებელია გამოიწვიოს მწვავე მოწამვლა.
რაც შეეხება ომბუდსმენის კონსილიუმის დასკვნას, მიხეილ სააკაშვილის მდგომარეობა მე-4 ხარისხის კახექსიით არის შეფასებული და ის სხვა ქვეყნის მრავალპროფილურ კლინიკაშია გადასაყვანი.
14 დეკემბერს ევროპარლამენტის მიღებულ რეზოლუციაში, მათ შორის, საუბარია მიხეილ სააკაშვილის განთავისუფლების და სამკურნალოდ საზღვარგარეთ გადაყვანის საკითხზე. ევროპარლამენტი მოუწოდებს საქართველოს პრეზიდენტს, სალომე ზურაბიშვილს გამოიყენოს თავისი კონსტიტუციური პრეროგატივა მიხეილ სააკაშვილის საკითხის მოსაგვარებლად.
დახურვა