"როგორ მოგმართოთ, ბატონო შალვა, ბატონო სპიკერო თუ ბატონო აგენტო?" - მიმართა ლელოს დეპუტატმა ანა ნაცვლიშვილმა პარლამენტის თავმჯდომარეს, შალვა პაპუაშვილს.
ანა ნაცვლიშვილმა პაპუაშვილს მისი სამუშაო გამოცდილება შეახსენა, რომელიც არასამთავრობო სექტორს უკავშირდება. პაპუაშვილი 2007 წლიდან გერმანიის საერთაშორისო თანამშრომლობის საზოგადოებაში (GIZ) მუშაობდა, 2017-2020 წლებში კი GIZ-ის საქართველოს გუნდის ხელმძღვანელი იყო.
"მომმართეთ პარლამენტის თავმჯდომარევ", - უპასუხა პაპუაშვილმა დეპუტატს.
"არ ვიცი, მაშინ "ყოფილი დამსახურებული აგენტი" - მე ასე მოგმართავთ, რადგან თქვენც იმ წიაღიდან მოდიხართ, რომელსაც აგენტად გამოცხადებას უპირებთ", - განაცხადა ანა ნაცვლიშვილმა პარლამენტის პლენარულ სხდომაზე.
დეპუტატის თქმით, ეს არაა კანონი, რომელიც გამჭვირვალეობას უზრუნველყოფს, არამედ აუქმებს სამოქალაქო საზოგადოებას.
"შემთხვევით ხომ არ მოგიკითხავთ ოჩიგავას საქმე, ვინ მოიგო, ვინ მუშაობდა ამ საქმეზე, როგორც ნაწამები პატიმრებისა და დაჩაგრული ადამიანების საქმეებზე წლების განმავლობაში? ზუსტად ის ხალხი მუშაობდა, ვისაც თქვენ ახლა უპირებთ, რომ უცხოური ქვეყნის აგენტები დაარქვათ და ქუჩებში თქვენი ტიტუშკები მიუქსიოთ ძალიან კარგად იცით, თქვენ, ბატონო შალვა, ომ თითოეული თეთრი რომელსაც არასამთავრობო ორგანიზაციები, მედიები, აქტივისტთან ჯგუფები, ადამიანები იღებენ სტრატეგიული პარტნიორებისგან, რომლებისგანაც თქვენ ბიუჯეტში იღებეთ მილიონობით თანხებს, იგივე პარტნიორები აფინანსებენ ჩვენს თავდაცვას, ჯანდაცვას, განათლებას, გელათის რეაბილიტაციას და ა.შ. ის თანხები იხარჯება გამჭვირვალედ და როგორც დონორები, ისე სახელმწიფო სრულ ინფორმაციას ფლობს, ვისგან მოდის ეს თანხები. შემირცხვენია იმ ქვეყნის უსაფრთხოება, რომელსაც ჰგონია, რომ მის ქვეყანაში რომელიმე ქვეყანა აგენტურულ ქსელს აბამს და იმას ელოდება, რომ აგენტი მივა და დაწერს აგენტი ვარო", - განაცხადა ნაცვლიშვილმა.
***
ქართული ოცნებიდან ფორმალურად წასულმა დეპუტატებმა, რომლებიც საკუთარ თავს "ხალხის ძალას" უწოდებენ, დააინიციირეს კანონპროექტი, რომელიც საქართველოში "უცხოური გავლენის აგენტებს" გააჩენს. ეს კანონი შეეხება ყველას, ვინც ხელისუფლებას აკრიტიკებს. "უცხოური გავლენის აგენტებად" დარეგისტრირდებიან ორგანიზაციები და მედიასაშუალებები, რომელთა შემოსავლის 20%-ზე მეტი უცხოური წყაროა.
მსგავსი კანონი მოქმედებს რუსეთში, რომელიც პუტინის ოპონენტების წინააღმდეგ გამოიყენება. რუსეთის მაგალითის გადმოღება და "უცხოური აგენტების" "გამოვლენა" სცადა უნგრეთმაც. ევროპულმა სასამართლომ განაცხადა, რომ კანონი ევროპულ პრინციპებთან შეუთავსებელია და საბოლოოდ უნგრეთმა კანონი გააუქმა.
ქართულ ოცნება მხარს უჭერს კანონპროექტს. მმართველ პარტიაში აცხადებენ, რომ მსგავსი კანონი აშშ-შიც მოქმედებს, ამავე არგუმენტს იყენებდა რუსეთიც. თუმცა ისინი მანიპულირებენ, როდესაც ამერიკული კანონის მოქმედების დეტალებზე არ საუბრობენ. ამერიკული კანონი სხვა სახელმწიფოების პოლიტიკური ლობიზმის გამოსავლენადაა მიმართული, განსხვავებით ქართული ოცნების რუსული კანონისგან.
დახურვა