logo
ENG



ბრიტანეთის პარლამენტის თემთა პალატამ ჰოლოდომორი უკრაინელი ხალხის გენოციდად აღიარა

26 მაი 202308:03
3 წუთის საკითხავი
clock 514
2023/05/26/2rq58ph6n8idffa.png

ბრიტანეთის პარლამენტის თემთა პალატამ 1932-33 წლებში მომხდარი ჰოლოდომორი უკრაინელი ხალხის გენოციდად აღიარა.

კონსერვატიული პარტიის დეპუტატმა პოლინ ლეტჰემმა, რომელმაც თემთა პალატაში შესაბამისი რეზოლუცია წარადგინა, ხაზგასმით აღნიშნა, რომ 1930-იანი წლების დასაწყისში უკრაინაში შიმშილობა ხელოვნური იყო, რომელიც გამოწვეული იყო უკრაინელი გლეხებისგან მოსავლის იძულებით წართმევით. მან ასევე გაავლო პარალელები მიმდინარე მოვლენებთან, როდესაც რუსეთი უკრაინის ოკუპირებული ტერიტორიებიდან მარცვლეულს იპარავს.

"ამიტომ ჩვენ უნდა დავარწმუნოთ უკრაინის ხელისუფლება და საერთაშორისო სამართლებრივი წესრიგი, რომ გაერთიანებული სამეფო - ყოველ შემთხვევაში, ბრიტანეთის პარლამენტი - არ უგულებელყოფს სამხედრო დანაშაულებს და კაცობრიობის წინააღმდეგ ჩადენილ დანაშაულებს", - განაცხადა ლეტჰემმა.

სხვა დეპუტატებმა, რომლებმაც გადაწყვეტილებას მხარი დაუჭირეს, აღნიშნეს, რომ ჰოლოდომორის გენოციდად აღიარება, უკრაინელი ხალხისადმი სოლიდარობის გამოვლინებაა და იმის სიგნალი, რომ შიმშილი არ უნდა იქნას გამოყენებული, როგორც ომის წარმოების საშუალება.

***

ჰოლოდომორი 30-მდე ქვეყნის პარლამენტების, მათ შორის ევროპაში, აღიარებულია უკრაინელი ხალხის გენოციდად. კერძოდ, ჰოლოდომორი უკრაინელი ხალხის გენოციდად აღიარეს აშშ-მა, გერმანიამ, ირლანდიამ, რუმინეთმა, მოლდოვამ, ბულგარეთმა და ასევე ევროპარლამენტმა.

ჰოლოდომორი - მასობრივი შიმშილი უკრაინის საბჭოთა რესპუბლიკაში 1932-33 წლებში - გამოწვეული იყო მარცვლეულის შესყიდვის პოლიტიკით და გლეხებისგან საკვების ყველა მარაგის ჩამორთმევით. შიმშილის შედეგად დაიღუპა სულ მცირე 5 მილიონი ადამიანი, ზუსტი რიცხვი უცნობია. ბევრი ისტორიკოსი თანხმდება, რომ ეს იყო შიმშილი, რომელიც უკრაინის ტერიტორიაზე მიზანმიმართულად იყო ორგანიზებული საბჭოთა ხელისუფლების მიერ. უკრაინის უმაღლესმა რადამ ჰოლოდომორი გენოციდად 2006 წელს აღიარა. რუსეთის ხელისუფლება მსგავს შეფასებას ეწინააღმდეგება.

 


close დახურვა