აქტივისტი სამირა ბაირამოვა ამბობს, რომ მუქარის შემდეგ გადაწყვიტა, საცხოვრებელი ადგილი შეიცვალოს. მისი თქმით, ეს პირველი შემთხვევა არ არის, თუმცა სახლის კედლებზე წარწერების დატოვება წითელი ხაზი იყო. ამის შესახებ მან გიორგი თარგამაძის ფორმულას ეთერში ისაუბრა.
"დღეს მივიღე გადაწყვეტილება, კიდევ უნდა შევიცვალო ჩემი საცხოვრებელი ადგილი. კონკრეტულად არ ვიცი, საქართველოში სხვა რეგიონში გადავალ თუ საზღვარგარეთ, მაგრამ დროებით მომიწევს ჩემი საცხოვრებელი ადგილის შეცვლა, იმიტომ, რომ ეს უკვე იყო წითელი ხაზი ჩემთვის. ან ამ ადამიანებთან უნდა შევიდე ფიზიკურ დაპირისპირებაში. ასევე, ვცდილობ, სახლში მქონდეს შესაბამისი აღჭურვილობა, რადგან ამ სახლში ცხოვრება ჩემთვის უკვე არ არის უსაფრთხო", - განაცხადა მან.
დღეს აქტივისტ სამირა ბაირამოვას სახლის კედელზე რუსეთის დროშა, კარზე კი ჯვარი დაუხატეს. მისი თქმით, შეღებეს "შინ ევროპისკენ" და ქალთა ძალის სიმბოლიკები, ასევე, მოიპარეს "გახსოვდეს აგვისტოს ომის" ლოგო.
სამირა ბაირამოვა არაერთხელ გამხდარა მუქარისა და თავდასხმის ობიექტი, მათ შორის ქართული ოცნების მხარდამჭერებისა და პრორუსული ალტ-ინფოს მხრიდან. ერთ-ერთი ბოლო შემთხვევა მარნეულში მოხდა, როცა პროევროპული კამპანიის ფარგლებში მოსახლეობასთან შეხვედრის დროს ბაირამოვას ქართულ ოცნებასთან დაკავშირებული აგრესიული ჯგუფები თავს დაესხნენ და სიტყვიერი შეურაცხყოფა მიაყენეს. "ქრისტიანებთან საუბრის უფლება არ გაქვს", - მიმართავდნენ ისინი ბაირამოვას.
დახურვა