რუსული კვლევითი ორგანიზაციის levada center-ის ჩატარებული გამოკითხვის თანახმად, ვლადიმერ პუტინის მხარდაჭერის რეიტინგი რუსეთში 69%-მდე გაიზარდა, რაც ბოლო 6 თვეში ყველაზე მაღალი მაჩვენებელია. ვლადიმერ პუტინის რეიტინგი უკრაინაში დაძაბულობის ზრდის ფონზე გაიზარდა.
levada center-ის მონაცემების თანახმად, პუტინის საქმიანობის დადებითი შეფასება დეკემბერში 64% იყო, იანვარში კი 69% გახდა.
levada center აღნიშნავს იმასაც, რომ გარდა ვლადიმერ პუტინისა, გასულ თვეში, გაიზარდა რუსეთის პრემიერმინისტრის და პარლამენტის მხარდაჭერაც.
კვლევის თანახმად, გაიზარდა პუტინისადმი ნდობაც, პირველ სამ პოლიტიკოსს შორის, ვისაც რუსეთში ენდობიან, გამოკითხვის თანახმად არის სერგეი ლავროვიც.
levada -მ იანვრის თვეში რუსეთის 50 რეგიონში 1626 რესპოდენტი გამოკითხა.
***
უკვე 2 თვეზე მეტია, რუსეთმა უკრაინის საზღვართან 100 000 ჯარისკაცი განალაგა. დასავლეთი შიშობს, რომ რუსეთი უკრაინაზე თავდასხმას გეგმავს. სამხედრო მობილიზებას კრემლი უსაფრთხოების მოტივით ამართლებს.
12 იანვარს ბრიუსელში NATO-რუსეთის საბჭოს სხდომა გაიმართა. შეხვედრის შემდეგ იენს სტოლტენბერგმა განაცხადა, რომ ნატომ რუსეთს შესთავაზა სამხედრო წვრთნების გამჭვირვალობის გაზრდის კონკრეტული გზები საშიში სამხედრო ინციდენტების თავიდან აცილების და სივრცითი და კიბერ საფრთხეების შემცირების მიზნით.
თავის მხრივ რუსეთმა კვლავ თავისი მოთხოვნები დააყენა: უკრაინის სიახლოვეს NATO-ს სამხედრო განლაგებების გაუქმება, ალიანსის გაფართოებაზე უარის თქმა და 2008 წლის ბუქარესტის სამიტზე მიღებული იმ გადაწყვეტილების უკან წაღება, რომლის თანახმადაც, უკრაინა და საქართველო აუცილებლად გახდებიან ალიანსის წევრები.
პასუხად იენს სტოლტენბერგმა განაცხადა, რომ იმ შემთხვევაში, თუ რუსეთი უკრაინაში შეიჭრება, სერიოზულად განიხილება ალიანსის აღმოსავლეთ ევროპის წევრი ქვეყნების გაძლიერება.
ამასთან, ბალტიის ქვეყნების განცხადებით, ისინი NATO-სთან მუშაობენ, რათა ამ ქვეყნებში ალიანსის სამხედრო კონტინგენტი გაიზარდოს.
აშშ-ის სახელმწიფო მდივნის, ენტონი ბლინკენის თქმით, მიუხედავად იმისა, რომ აშშ მზად არის, მოისმინოს მოსკოვის წუხილები, რთული იქნება რამე სახის პროგრესის მიღწევა მანამ, სანამ რუსეთი უკრაინის საზღვართან ვითარების დეესკალაციას არ მოახდენს.
ენტონი ბლინკენისვე თქმით, აღმოსავლეთ ევროპიდან ჯარების გაყვანის განხილვა და NATO-ს გაფართოებაზე უარის თქმა გამორიცხულია.
გარდა ამისა, ამერიკული მედიის ინფორმაციით, ჯო ბაიდენის ადმინისტრაციამ შეიმუშავა ახალი, უფრო მკაცრი სანქციების პაკეტი რუსეთის მიმართ იმ შემთხვევაში, თუ ის უკრაინაში შეიჭრება.
დახურვა