logo
ENG



არველაძე შენგელიაზე: არ მიმაჩნია სწორად მორალისტობა, როცა რუსეთზე საერთო გეგმა არ გვაქვს

10 ივლ 202022:56
3 წუთის საკითხავი
 
wg9vkvpkkpsrdv7.jpg

საქართველოს კალათბურთის ეროვნული ნაკრების კაპიტან თორნიკე შენგელიას, რუსულ გუნდ ცსკა-ში გადასვლასთან დაკავშირებით, ვეტერანი ფეხბურთელი შოთა არველაძე განცხადებას ავრცელებს. 

მისი თქმით, მან თავისი პოზიცია რუსეთთან და მის სახელმწიფოს პოლიტიკასთან დაკავშირებით, საჯაროდ არაერთხელ გამოხატა, ამიტომ იმისთვის, რომ სამმაგი სტანდარტით ცხოვრებას მოვერიდოთ, მნიშვნელოვანია ჩვენი პოზიცია თანაბრად ვრცელდებოდეს არა ერთ ან ორ კონკრეტულ ადამიანზე, არამედ ზოგადად რუსეთში თამაშზე, მუშაობაზე, ბიზნესის კეთებასა თუ ნებისმიერ აქტივობაზე.

„ისეთი ამბების თავიდან ასაცილებლად, რომელსაც თორნიკე შენგელიასთან მიმართებაში, უკვე მეორე დღეა თვალს ვადევნებთ, ვფიქრობ, ყველა ერთად უნდა შევთანხმდეთ, რაზე უნდა გვქონდეს უარყოფითი რეაქცია და რაზე არა. ჩემი პოზიცია რუსეთთან და ამ სახელმწიფოს პოლიტიკასთან დაკავშირებით, საჯაროდ არაერთხელ გამოვხატე. იმისთვის რომ მოვერიდოთ სამმაგი სტანდარტით ცხოვრებას, მნიშვნელოვანია ჩვენი პოზიცია თანაბრად ვრცელდებოდეს არა ერთ ან ორ კონკრეტულ ადამიანზე, არამედ ზოგადად, რუსეთში თამაშზე, მუშაობაზე, ბიზნესის კეთებასა თუ ნებისმიერ აქტივობაზე.

საქართველოს ნაკრების სპონსორია VTB ბანკი და საინტერესოა, რატომ არ აღმოაჩნდა არცერთ ქართულ ბანკს იმაზე მეტი სურვილი, ვიდრე რუსულს, ყოფილიყო ნაკრების სპონსორი და მთავარი პარტნიორი. ამიტომ, ერთხელ და სამუდამოდ უნდა ვთქვათ და შევთანხმდეთ, რა არის ჩვენთვის წითელი ხაზი და რა არა. არ მიმაჩნია სწორად მორალისტობა, ერთი ადამიანის ამოჩემება და ლანძღვა, მაშინ როცა რუსეთთან მიმართებაში, საერთო სამოქმედო გეგმა, როგორც საზოგადოებას არ გაგვაჩნია. მინდა თორნიკეს ყველა იმ მიზნის მიღწევა ვუსურვო, რომელიც დასახული აქვს“, - წერია არველაძის ფეისბუქ პოსტში.

შეგახსენებთ, თორნიკე შენგელიამ ესპანური "ბასკონია" 6 წლის შემდეგ დატოვა და რუსულ "ცსკა"-ში გადავიდა. ეს ფაქტი თავად ესპანურმა კლუბმა სოციალურ ქსელში დაადასტურა და ქართველ კალათბურთელს "ბასკონიაში" გატარებული დროისთვის მადლობა გადაუხადა. ინფორმაცია მოსკოვური კლუბის ოფიციალურმა twitter გვერდმაც დაადასტურა. საქართველოს ეროვნული ნაკრების კაპიტანი რუსული არმიის კლუბში მომავალი 3 წლის განმავლობაში ითამაშებს.

შენგელიას ამ გადაწყვეტილებას საქართველოს პრეზიდენტი სალომე ზურაბიშვილიც გამოეხმაურა. ზურაბიშვილმა აღნიშნა, რომ საქართველოს საკალათბურთო ნაკრების მოსკოვის გუნდში გადასვლა მისთვის მიუღებელია. 

თავად შენგელია ამბობს, რომ ის გადაწყვეტილებით კმაყოფილია და იმედოვნებს, რომ “ცსკა”-სთან ერთად დიდ წარმატებას მიაღწევს. 

სპორტსმენის რუსულ გუნდში ტრანსფერს მისი მამაც გამოეხმაურა. კახა შენგელიას თქმით, 3-წლიანი კონტრაქტის გაფორმება სასიხარულო და მოსალოცი ამბავია. 

გარდა ამისა, მოსკოვის "ცსკა"-ში თორნიკე შენგელიას ტრანსფერთან დაკავშირებით განცხადება საქართველოს კალათბურთის ფედერაციამაც გაავრცელა. განცხადების თანახმად, თორნიკე შენგელია ყოველთვის დაიცავს სამშობლოს და ნაკრების ღირსებას. 


close დახურვა