ამერიკელი გენერლის, ბენ ჰოჯესის აზრით, რუსეთის მიერ უკრაინაში თავდასხმის წამოწყების ალბათობა 90%-ია.
ფორმულას ეთერში, გადაცემაში პოლიტიკის ფორმულა, ჰოჯესმა თქვა:
"ჩემზე პრეზიდენტ ზელენსკის შემართებამ დიდი შთაბეჭდილება მოახდინა. მას ესმის ის დიდი საფრთხე, რომელიც ემუქრება მის ქვეყანას. ის არ ითხოვს ჯარისკაცებს სხვა ქვეყნებისგან, ის ითხოვს აღჭურვილობას, ტყვია-წამალს და ფინანსურ მხარდაჭერას, იმიტომ, რომ ის, რასაც რუსეთი აკეთებს, უკრაინის ეკონომიკის დანგრევაცაა. მას სჭირდება დიპლომატიური და ფინანსური მხარდაჭერა.
დიახ, საფრთხედ ნამდვილად რეალურია. ჩემი აზრით, 90%-ია შანსი იმისა, რომ რუსეთი წამოიწყებს თავდასხმას - არა მასიურ თავდასხმას, არამედ გააგრძელებს იმას, რასაც აკეთებს შავი ზღვის სანაპიროს გასწვრივ და აზოვის რეგიონში. საკმაოდ რეალურია, რომ ისინი გააგრძელებენ ასეთ წნეხს უკრაინაზე".
რუსული ჯარები როგორც უკრაინის აღმოსავლეთით, ისე ბელარუსში, ოკუპირებულ ყირიმსა და შავ ზღვაში.
მიუხედავად ამისა, ბენ ჰოჯესი არ მიიჩნევს, რომ რუსეთს საკმარისი ძალა აქვს უკრაინას ყველა ამ მხრიდან შეუტიოს.
მისი განცხადებით, 2014 წელთან შედარებით, როცა რუსეთმა ყირიმის ოკუპაცია მოახდინა და დონეცკსა და ლუგანსკში შეიჭრა, უკრაინის ჯარიც და მოსახლეობაც უკეთ არის მომზადებული თავდასხმისთვის. ამასთანავე, ჰოჯესი ფიქრობს, რომ რუსეთი შეუქმნის პრობლემას უკრაინის გენერალურ შტაბს და ხელისუფლებას, თუმცა, მაქსიმალურად ეცდება, დასავლეთს არ მისცეს საშუალება, რუსეთის წინააღმდეგ ყველა სანქცია გამოიყენოს.
***
უკვე 2 თვეზე მეტია, რუსეთმა უკრაინის საზღვართან 100 ათასი ჯარისკაცი განალაგა. დასავლეთი შიშობს, რომ რუსეთი უკრაინაზე თავდასხმას გეგმავს.
სამხედრო მობილიზებას კრემლი უსაფრთხოების მოტივით ამართლებს და უარყოფს, რომ შეჭრას აპირებს.
თუმცა, აშშ აცხადებს, რომ რუსეთი უკრაინაში შეჭრას გეგმავს.
უკრაინის საზღვართან რუსი სამხედროების მობილიზების გამო NATO-ს ქვეყნები უკრაინას სამხედო დახმარებას უწევენ, ამასთან, აძლიერებენ ალიანსის აღმოსავლეთ ნაწილს, რაც აღმოსავლეთ ევროპაში სამხედრო გემების, საბრძოლო თვითმფრინავების და სხვა შეიარაღების დამატებითი რაოდენობის გაგზავნას გულისხმობს.
დანია ბალტიის ზღვარში საბრძოლო ხომალდს - ფრეგატს აგზავნის, ასევე, ლიეტუვაში განათავსებს 4 ერთეულ F-16 ტიპის საბრძოლო თვითმფრინავს. ესპანეთი ასევე აგზავნის საბრძოლო გემებს, რომლებიც NATO-ს საზღვაო ძალებს შეუერთდებიან, ასევე, განიხილავს ბულგარეთში საბრძოლო თვითმფრინავების განლაგებას. საფრანგეთი გამოხატავს მზაობას, რუმინეთში, NATO-ს ბრძანების ქვეშ, ჯარისკაცები გაგზავნოს. ნიდერლანდები აპრილში ასევე გაგზავნიან 2 F-35 საბრძოლო თვითმფრინავს ბულგარეთში, რათა მხარი დაუჭირონ NATO-ს საჰაერო-სამხედრო აქტივობას რეგიონში. ასევე, აგზავნის როგორც გემს, ისე ქვეით დანაყოფებს, რათა შეუერთდნენ NATO-ს საპასუხო რეაგირების ძალებს. ასევე, აშშ-მ ცხადად განახცადა, რომ გეგმავს სამხედრო ყოფნის გაზრდას ნატოს აღმოსავლეთ ნაწილში.
აშშ-მ კი უკრაინის სამხედრო დახმარებისთვის დამატებით 200 მილიონი აშშ დოლარი გამოყო. ბოლო 2 წელიწადში აშშ-მ უკრაინას 650$-ის ღირებულების უსაფრთხოების მხარდაჭერა გაუწია, 2014 წლიდან კი ამ დახმარების 2,7 მილიარდს შეადგენს.
გარდა ამისა, რუსეთს "არნახული" ეკონომიკური სანქციები ემუქრება აშშ-ის მხრიდან იმ შემთხვევაში, თუ ის უკრაინაში შეიჭრება.
მას შემდეგ, რაც რუსეთმა უკრაინის საზღვართან ჯარები განალაგა, დასავლეთს პირობები წაუყენა:
უკრაინის სიახლოვეს NATO-ს სამხედრო განლაგებების გაუქმება, ალიანსის გაფართოებაზე უარის თქმა და 2008 წლის ბუქარესტის სამიტზე მიღებული იმ გადაწყვეტილების უკან წაღება, რომლის თანახმადაც, უკრაინა და საქართველო აუცილებლად გახდებიან ალიანსის წევრები.
რუსეთი ასევე ითხოვს, ნატოს ჯარები გავიდნენ აღმოსავლეთ ევროპის ქვეყნებიდან და დაბრუნდნენ იქ, სადაც 1997 წლამდე იყვნენ, ანუ მანამ, სანამ ეს ქვეყნები ალიანსის წევრები გახდებოდნენ.
აშშ-მ და ნატომ რუსეთთან დიალოგი სცადეს. რუსეთის წარმომადგენლები კვლავ ქვეყნის მოთხოვნებს იმეორებენ და ამბობენ, რომ თუ დასავლეთი ამას არ გაითვალისწინებს, შეთანხმება ვერ შედგება. დასავლეთი კი რუსეთის მოთხოვნებს არ ეთანხმება და არც მათ გათვალისწინებას აპირებს.
დახურვა