ამირან გამყრელიძის განცხადებით, ის გასცემს რეკომენდაციას, რომ სამედიცინო პერსონალის აცრა საქართველოში სავალდებულო იყოს.
დაავადებათა კონტროლის ცენტრის ხელმძღვანელის თქმით, ამ ეტაპზე ქვეყანაში აცრილია ექიმების 67%, ხოლო სრულიად სამედიცინო პერსონალში ვაქცინაციის მაჩვენებელი უფრო დაბალია.
ამირან გამყრელიძემ ვაქცინაციის შესახებ ფორმულას ეთერში ისაუბრა და მაგალითად რამდენიმე აცრა მოიყვანა, რომლებიც ქვეყანაში სამედიცინო პერსონალისთვის სავალდებულოა.
„ანტივაქსერიზმი არაა პროფესიასთან დაკავშირებული, ის ყველა ჯგუფშია. ბევრი გვიფიქრია და ექიმებს სავალდებულოობა გვაქვს სხვა აცრებთან დაკავშირებით, მაგალითად ჰეპატიტის აცრა სავალდებულოა აგრესიული დისციპლინების სამედიცინო პერსონალში. კანონითაა დადგენილი. ისევე, როგორც წითელას საწინააღმდეგოდ უნდა იყონ აცრილი და ა.შ.
სავალდებულოობა იმუნიზაციასთან დაკავშირებით დიდი კითხვის ნიშნის ქვეშაა ყოველთვის. ყველაზე უფრო დემოკრატიულმა ქვეყნებმა შემოიღეს. მე მაგალითად რეკომენდაციას ვაკეთებ და მიმაჩნია, რომ ჩვენ, ექიმები, სამედიცინო პერსონალი უნდა ვიყოთ მაგალითი.
ჩვენთან 82%-ია აცრილი და ყოველ დილა ვკითხულობ, როდის უნდა ავიდეთ 90%-ზე. ჩვენთან, დაავადებათა კონტროლის ცენტრში, არ ვართ 100% აცრილი. 82% არაა ცუდი მაჩვენებელი, რაც გვაქვს, მაგრამ ჩვენ მაგალითი უნდა ვიყოთ, 90-95% უნდა ვიყოთ აცრილი", - განაცხადა ამირან გამყრელიძემ.
დახურვა