სუს-ის ყოფილი მაღალჩინოსანი სოსო გოგაშვილი აცხადებს, რომ სახელმწიფო უსაფრთხოების სამსახურში მუშაობის პერიოდში ორი ელჩი "აგენტურულ ბაზაში" ჩარიცხვის მიზეზით დაბლოკა, თუმცა ოცნების მოთხოვნით, ელჩები თანამდებობებზე მაინც დაინიშნნენ.
გოგაშვილი მორიგ წერილში ჰყვება, რომ დიპლომატებმა დაბლოკვის შემდეგ "პატრონი" შეაწუხეს, გომელაურმა კი მას დანიშვნის შეჩერების ცნობა დაახევინა.
გოგაშვილის ინფორმაციით, ერთ-ერთი ელჩის რეკომენდატორი გოგა ხაინდრავა იყო.
ამასთან, გოგაშვილის თქმით, ამ ორი ელჩის გადანიშვნის დრო მიმდინარე პერიოდში და სურვილის შემთხვევაში, პრეზიდენტს ან მის წარმომადგენელს დიპლომატების სახელებისა და გვარების მიწოდებას სთავაზობს.
"საგარეო საქმეთა სამინისტრო იქამდე, სანამ რომელიმე ქვეყანაში წარადგენს საქართველოს ელჩს ან დიპლომატიური სტატუსის მქონე ნებისმიერ კანდიდატს, ის სუს-ში აგზავნის დასანიშნი კანდიდატების სიას. სუს-ის ფუნქციაა გადაამოწმოს ყველანაირად კანდიდატი, ასევე, დამატებით ვალდებულებას ანიჭებს ,,თავისუფლების ქარტიაც’’ თუ კანდიდატი ირიცხება სუს-ის აგენტურულ ბაზაში ან აქვს საეჭვო კავშირები მტრულად განწყობილ სახელმწიფოსთან, ის დაუყოვნებლივ იბლოკება და შემდეგ ტარდება შესაბამისი ღონისძიებები. ჩემი სუს-ში მუშაობის პერიოდში, საგარეოდან კონტრდაზვერვაში გადმოიგზავნა სტანდარტულად ელჩად დასანიშნი კანდიდატების სია.
გადამოწმების შედეგად აღმოჩნდა, რომ ორი მათგანი ირიცხება აგენტურულ ბაზაში (სუკი), შესაბამისად მე გადავეცი დავალება შეეჩერებინათ მათი დანიშვნა, დანარჩენების სია კი გადავაგზავნე საგარეო საქმეთა სამინისტროში. დაბლოკილმა კანდიდატებმა გაჭიანურების შემდეგ მოიკითხეს საგარეო საქმეთა სამინისტროში თუ რა ხდებოდა, სადაც უთხრეს, რომ გოგაშვილმა დაბლოკა ისინი. მათ ბუნებრივია შეაწუხეს თავის "პატრონი", რომელმაც დიდი აჟიოტაჟი ატეხა, დაურეკა ივანიშვილსა და კვირიკაშვილს. დამიბარა ჩემმა უფროსმა, გომელაურმა და მომთხოვა თუ რა მიზეზით მყავდა დაბლოკილი ელჩობის კანდიდატები.
,,შეფმა ცალკე დამირეკა და კვირიკაშვილმა ცალკე ამ საქმეზეო’’ - თქვა გომელაურმა. ერთის რეკომენდატორი ყოფილა გოგა ხაინდრავა და დეტალურად გამირკვიე რა ხდებაო. მე მას ავუხსენი ყველაფერი და გავაცანი ოპერატიული ცნობა აგენტების შესახებ, მან მითხრა, რომ ცნობა დამეხია და ორივეზე გამეშვა თანხმობა საგარეო საქმეთა სამინისტროში, რაც მე შესაბამისად შევასრულე. ამ ,,ელჩების’’ გადანიშვნის პერიოდი ჩემი ვარაუდით ახლა უწევს და არ არის გამორიცხული, ეს უკვე პრეზიდენტის მაგიდაზე იდოს.
სურვილის შემთხვევაში, პრეზიდენტის წარმომადგენელს ან დეპუტატს, რომელთაც აქვთ წვდომა მსგავს ინფორმაციაზე, შემიძლია მივაწოდო კონკრეტული გვარები. პ.ს ამ ,,ინციდენტის’’ შემდეგ გოგა ხაინდრავა გადამემტერა. იყო კიდევ ორი ,,ინციდენტი’’, რომელიც არ არის პირადული და მე საზოგადოებას ამის შესახებ მივწვდი ინფორმაციას, რადგან ეს საკითხები ეხება ადამიანების უფლებების დარღვევებს"- ამბობს გოგაშვილი.
დახურვა