გორში, წმინდა წყლის დასახლებაში მდებარე ტანსაცმლისა და შერეული საქონლის ბაზრობაზე ხანძარი ლიკვიდირებულია.
შსს-ს საგანგებო სიტუაციების მართვის სამსახურის ინფორმაციით, ხანძრის შედეგად არავინ დაშავებულა.
უწყების ცნობით, მეხანძრე-მაშველების დახმარებით, ბაზრის ტერიტორიიდან, მოვაჭრეებმა გასაყიდად გამზადებული პროდუქციის უსაფრთხო ადგილას გამოტანა და ხანძრისგან გადარჩენა მოახერხეს.
"არსებობდა, ცეცხლის გვერდით მდგარ შენობებზე გავრცელების საფრთხეც, თუმცა მეხანძრე-მაშველების დროული რეაგირების შედეგად მოხერხდა ბაზრის მნიშვნელოვანი ნაწილის გადარჩენა.
ნახანძრალი ტერიტორიის დამუშავება და მონიტორინგი მთელი ღამის განმავლობაში უწყვეტ რეჟიმში მიმდინარეობდა. ამ დროისთვის ხანძარი სრულად ლიკვიდირებულია", - ნათქვამია განცხადებაში.
მომხდარ ფაქტზე გამოძიება საქართველოს სისხლის სამართლის კოდექსის 188-ე მუხლის მეორე ნაწილით დაიწყო (ნივთის დაზიანება ან განადგურება ჩადენილი ცეცხლთან ან მომეტებული საფრთხის წყაროსთან გაუფრთხილებელი მოპყრობით).
დახურვა