ევროპარლამენტარი მარკეტა გრეგოროვა ირაკლი ღარიბაშვილის დღევანდელ განცხადებას, რომ ქართველი ოპოზიციონერები ცდილობდნენ დაერწმუნებინათ ევროპარლამენტარები, რომ საქართველოსთვის ევროკავშირის კანდიდატის სტატუსი არ მიეცათ სიცრუეს უწოდებს.
გრეგოროვა აცხადებს, რომ ირაკლი ღარიბაშვილი ბრიუსელში არ უნახავს, სამაგიეროდ შეხვდა ოპოზიციის წარმომადგენლებს, ვინც ევროპარლამენტარებს სთხოვდა საქართველოსთვის კანდიდატის სტატუსის მინიჭებისთვის მხარი დაეჭირათ.
"იყავით ბრიუსელში? მე არ მინახიხართ. მაგრამ მე ვიყავი ოპოზიციასთან შეხვედრებზე და ყველა მათგანი თითქმის გვევედრა კანდიდატის სტატუსზე. ამიტომ ნუ ცრუობთ. ჩამოდით ბრიუსელში და ჩვენ შეგვიძლია ვისაუბროთ. ნუ იქნებით პრობლემა, იყავით გამოსავალი" - წერს გრეგოროვა.
@GharibashviliGe Have you been in Brussels? I didn't see you. But I have been in meetings with opposition and ALL of them almost begged us for the candidate status. So don't lie. Come to Brussels and we can talk. Don't be the problem, be the solution.
დღეს პარლამენტის წინაშე გამოსვლისას ირაკლი ღარიბაშვილმა განაცხადა, რომ სალომე სამადაშვილი და ოპოზიციის სხვა წარმომადგენლები ბრიუსელში "კარდაკარ დადიოდნენ" იმისთვის, რომ ევროპარლამენტარები დაერწმუნებინათ, საქართველოსთვის ევროკავშირის კანდიდატის სტატუსი არ მიენიჭებინათ.
ამავე განცხადებას გამოეხმაურა ევროპარლამენტარი ვიოლა ფონ კრამონი. მისი თქმით, პრემიერ ღარიბაშვილს ბრატისლავაში ყოფნისას სთხოვა შეხვედრა, თუმცა ღარიბაშვილისგან პასუხი არ მიუღია.
დახურვა