დიუშენის სინდრომის მქონე ბავშვების მშობლები დღეიდან უწყვეტ საპროტესტო აქციებს იწყებენ

დიუშენის სინდრომის მქონე ბავშვების მშობლები დღეიდან უწყვეტ საპროტესტო აქციებს იწყებენ.

მშობლები 17:00 საათიდან "ქართული ოცნების" მთავრობის ადმინისტრაციასთან შეიკრიბებიან და ახლა უწყვეტი ფორმით მოითხოვენ წამალს საკუთარი შვილებისთვის.

მშობლები "ქართული ოცნების" მთავრობას კიდევ ერთხელ მოუწოდებენ: დაუყოვნებლივ დაფინანსდეს მკურნალობა და ქვეყანაში შემოვიდეს სასიცოცხლოდ მნიშვნელოვანი მედიკამენტები.  

დიუშენის კუნთოვანი დისტროფიის მქონე ბავშვები და მათი მშობლები 15 აპრილს მთავრობის ადმინისტრაციაში არ შეუშვეს. წინ პოლიციელები გადაეღობნენ. მათ შენობაში შესვლის ნება მხოლოდ 3 მშობელს დართეს, განცხადების დასაწერად და ამბის გასარკვევად. მაგრამ მშობლებს სურდათ არა მორიგი განცხადების დაწერა, არამედ პრემიერ-მინისტრთან შეხვედრა და მისგან კონკრეტული პასუხის მოსმენა, როდის შემოიტანს სახელმწიფო მათი შვილების სიცოცხლისთვის აუცილებელ წამალს.

მშობლებმა კანცელარიასთან კარვების დადგმაც სცადეს, მაგრამ შსს-მ მათ ამის უფლება არ მისცა. მშობლების პროტესტს პროპაგანდისტული ტელეკომპანია იმედის ეთერიდან გამოეხმაურა ოცნების ჯანდაცვის მინისტრი, რომელმაც რამდენიმე დღეში საზოგადებისთვის ინფორმაციის მიწოდება დააანონსა და გაკრვეული ადამიანები ოჯახების ემოციებით პოლიტიკური დივიდენდების მოპოვებაში დაადანაშაულა.

უკვე წელზე მეტია, რაც დიუშენის სინდრომის მქონე ბავშვების მშობლები სახელმწიფოსგან მომაკვდინებელი დაავადების სამკურნალო მედიკამენტების შემოტანასა და კვლევებისთვის დაფინანსების გამოყოფას ითხოვენ. საქართველოში დიუშენის კუნთოვანი ატროფიის მქონე მხოლოდ 100-მდე ბავშვია.

დიუშენის კუნთოვანი დისტროფია ერთ-ერთი ყველაზე გავრცელებული და მძიმე გენეტიკური კუნთოვანი დაავადებაა ბავშვებში. ახალი თაობის მედიკამენტს, რომლის შემოტანასაც მშობლები ითხოვენ, დიუშენის სინდრომის მქონე ბავშვებში ჯანმრთელობის თანმხლები გართულებების, მათ შორის, ეტლში ჩაჯდომის გადავადებაც შეუძლია.